O le saunoaga lea a le susuga i le faafeagaiga ia Fineaso Faavae, ina ua mafai ona aulia mai le 50 o ona tausaga lea na faamanatuina i le faaiuga o le vaiaso nei i totonu lava o lana Ekalesia Nasareta i East Tamaki.
O le tamā ia Fineaso na galue mai lava i Samoa i totonu o le Ekalesia Nasareta ma ina ua oo mai iinei na galue ai o ia i totonu o le Ekalesia Metotisi Evagelia Uesiliana.
E lei umi ae toe agai mai loa le susuga i le faafeagaiga ia Fineaso ma toe faaauau lana tautua i totonu o le Ekalesia Nasareta e pei ona iai lava i le taimi nei.
O le susuga ia Fineaso o loo faaipoipo atu o ia i le tamaitai lalelei o Tausaga Faavae mai Lefaga ae o ia e sau mai Samamea i Fagaloa. E toaono le la fanau, lea lava o loo soifua uma e oo mai lava i le taimi nei.
O moomooga ma saafiafiga o le tina ia Tausaga ina ua mafai ona aulia mai e le tamā o le aiga le 50 o ona tausaga e faaauau ai pea lana tautua i le Atua ma ia toe maua nisi tausaga se tele e toe faaopoopo ai pea lana auaunaga i le galuega a le Atua e pei ona totofi ai i laua.
