Ua mafai nei e tagata Pasefika o loo aumau i Niu Sila, ona fafaga atu lava i Niu Sila paleni o telefoni a nai aiga o loo faamuli mai nuu i atumotu o le Pasefika.
Ua faigofie lea fesootaiga ona o le tautua lē faatuaoia a le kamupani telefoni feaveai ua iloga lana tautua i tagata Pasefika, le Digicel, i le latou auaunaga fou ua ta‘ua o le “Top Up Your Friends & Family”.
O le Aso Lulu talu ai, aso 21 Iulai 2010 na tatala aloaia ai lea auaunaga fou a le Digicel i Aukilani ma na faataitai lava i lena aso e le alii Konesula Aoao o Samoa i Aukilani le uluai fesootaiga atu i Samoa i le kapeteni o le Manu Samoa Taitoafitu, le alii o Lolo Lui, a o molimau le anoano sa auai atu i lea aso.
Na mae‘a le faatasiga i lea taeao ma faataitai ai loa e nisi lenei auaunaga fou ma talatalanoa fiafia ai loa i nai aiga i Samoa.
O le Digicel, o le kamupani telefoni feaveai o loo taulamua lana auaunaga i le Pasefika e pei ona faatinoina ana galuega i totonu o atunuu e ono o le Pasefika.
E anoanoai faleoloa laiti poo dairies i totonu o Niu Sila atoa ua maua ai nei pepa telefoni ia e mafai ona faatau mai ma fafaga atu ai le credits poo paleni o telefoni a nai aiga i Samoa. E maua pepa telefoni mai le $15, $20, $30 ma le $50, ma e mafai ona fafaga atu telefoni i soo se atunuu o le Pasefika o loo oo i ai le auaunaga a le Digicel, pe a agai i le latou tuatusi i le upega o fesootaiga, www.digicelrecharge.com pe vili le 0800 DIGICEL (0800 34 44 235 poo le 09 9652715).
O lenei auaunaga a le Digicel Top Up e faaaogā e le tusa ma le 1.6 miliona tagata o loo iai telefoni Digicel i Fiti, Nauru, Papua Niu Kini, Samoa, Tonga ma Vanuatu, ma e fua lava i le tupe a lea atunuu ae leai foi nisi totogi e toe faaopoopo i ai. E toatele na auai atu i le faamoemoe o le Digicel i lea aso, e pei ona avea ai le Komesina Aoao o Samoa i Aukilani, le Afioga Faolotoi Reupena Pogi, ma malo faaaloalogia, faapea foi le Hai-Komesina o Tonga aemaise le afioga i le alii faipule Samoa i Magele, Susuga Su‘a William Sio.
Na saunoa le komesina Samoa, “O le ute lea o le aganuu a soo se tagata Pasefika ua aumau i Niu Sila, o le fia fesootai pea vavalalata ma se‘i lafo sina seleni ma ni meaalofa i nai aiga o loo tu‘i mai le mulipapaga ma taputapuai mai aiga ma nuu i le motu o le Pasefika.
E maoae le telē o le tupe o loo auina atu mai Niu Sila i tausaga taitasi i aiga i le Pasefika e o latou tagata o loo aumau i Niu Sila nei, ua avea ma fesoasoani tele e faaleleia ai soifuaga o nai tagata i atumotu.
O le ala lea na momoli ai le faamalo ma le faafetai a le alii konesula i le kamupani malosi a le Digicel, ona o le tau lagalaga i lenei auaunaga tāua ua latou faia.
O le mafai ona totogi atu i Niu Sila paleni mo telefoni i Samoa ma isi atumotu, o le a faigofie ai ona fesootai i taimi uma ma aso uma nai aiga, e ui lava ina va i vasa lo latou aumau ai.”
O le manatu lava e tasi lea na toe ta‘ua e le alii pule o le Digicel i Samoa, Pepe Christian Fruean, e pei ona ia toe faama‘oti le taugofie atu o lenei pepa telefoni ua faatau atu e le Digicel, nai lo tau o paleni mo telefoni feaveai o loo faatau ai Niu Sila e isi kamupani telefoni. Lona uiga ua leai se toe faigata o soo se fesootaiga, e fai o aiga ma uo, ae o faalapotopotoga foi ma ekalesia, o le a vave ma faigofie ona fesootai i aso uma.
Na faalauiloa ai ma se isi faapitoa a le Digicel mo na o le masina lenei o Iulai, e faaopoopo fua atu le 10 % o le credit i soo sau Top Up o le a faatau e fafaga ai paleni o telefoni a aiga i Samoa ma isi motu o le Pasefika.
