O le Aso Toonai na tea nei, na faaee ai se isi o taui aloaia ma le tāua, i se tasi o tamalii, o le alo o Samoa, le afioga ia Laauli Michael Niko Jones. O se polokalame tumau sa faatulagaina e le pulega o le lakapi a le lalolagi le IRB, ua faaigoaina o le Hall of Fame, sa filifilia ai Jones, o Niu Sila ma nisi alii taaalo e to‘a sefulu mai isi atunuu.
O Michael Jones, o loo faaauau pea ona talia ma faatulagaina o se tasi o numera fitu (No 7 Jersey) aupito lauiloa i le lalolagi, toe numera tasi i lona vaitaimi. E le gata i lea, ae o loo faaauau pea lava foi ona laualuga i talanoaga ma ave i ai le faamuamua e lē gata i le toatele o tagata lautele, ae faapea foi le IRB.
O le matautia o le faatinoina o le lakapi e lea foi alo o le atunuu, sa faamauina i faamaumauga a le IRB, o ia o se tagata malosi, toe tele sona sao mo le lakapi a le lalolagi. O se fiafiaga tele foi lea i le pulega o le lakapi le IRB, na mafua ai ona filifilia Michael Jones mo lea taui tāua tele.
Na saunoa Laauli, o le agaga maualalo sa lagonaina, ina ua faalauiloa ane lea foi tulaga tāua ma o se faaaloalo maualuga foi mai le pulega o le lakapi a le lalolagi. Sa ta‘utino foi Jones, o le moemitiga lava lea a soo se tama taalo lakapi a Niu Sila, mai lona tamaitiiti seia oo ina avea ma tagata matua, o le fia ulufale lea ma avea ma sui o le All Blacks.
O se itu aso foi e pei o lea afiafi ma le tauaaoina o lea tulaga tāua, ua o se luitau tele lea mo soo se tama taalo, aemaise ai ua peiseai o se oloa aogā ma le faapitoa mo le All Blacks.
O le afiafi sa faataunuuina ai le taaloga lona lua faitaulia i le va o le All Blacks ma le Wallabies a Ausetalia, sa faapea foi ona aloaia ai le tauaaoina le taui mo Laauli Michel Jones.
O Laauli Michael Niko Jones, sa faatulagaina o se tama taalo lona tolu sili ona matautia i le faasologa o tama taaalo a Niu Sila mo le 20 senituri, i tua mai o Colin Meads ma Sean Fitzpatrick, e tusa ai ma se faaiuga a le Rugby World Magazine.
Sa iloa tele foi o ia i le isi ona igoa valaau (nickname) o Iceman, ona talu ai o le tele o pepa aisa na te faaaogāina i ona manu‘a i taimi o taaloga. O John Hart sa ia uluai filifilia Laauli mo le au tele a Aukilani, ma sa ia faaaogāina foi se isi igoa e faamatala ai le ituaiga tagata taalo e iai le alo o le atunuu, e masani ai Hart ona ta‘ua Laauli (almost the perfect rugby player).
O le amataga iloa lea o le taleni a Laauli, peitai sa toe faasusulu atili i lana taaloga mo lona atunuu i Samoa, ma o lana taaloga faavaomalo muamua lea i le tausaga e 1986, a o lei filifilia e le All Blacks a Niu Sila.
O se tasi o matatia o loo ta‘uta‘ua ai pea lenei alo o le atunuu, ona o ia le uluai sikoa sa tatalaina ai le taamilosaga o le Ipu o le lalolagi i le tausaga e 1991, ma o le uluai ausia foi lea e le All Blacks o le Ipu o lea taamilosaga tāua.
E mai le 1991, sa faatoa toe papai lava Niu Sila i lea tulaga ma le umia o le Ipu o le taamilosaga tele a le lalolagi i le 2011. I lea foi tausaga sa toe faia ai i Niu Sila lea taamilosaga, sa tatala aloaia ai foi ma le faatagata, o le faatusa o Laauli Michael Jones o loo i totonu o le malae i Eden Park, i luma tonu o se tasi o faitotoa ulufale i le itu o loo iai le falematamata o le ASB.
O Laauli Michael Niko Jones, Fred Allen, Don Clarke, Sean Fitzpatrick, Grant Fox, Ian Kirkpatrick, John Kirwan, Colin Meads, Graham Mourie, George Nepia, o i latou uma ia o le Iuni lakapi a Niu Sila, sa filifilia ma faaee i ai le taui mai le IRB, faatasi ai ma le alii tusitala e toatasi o Terry McLean.
Na saunoa le faauluuluga o le Iuni lakapi a Niu Sila, Steve Tew e faapea, o se tulaga amanaia tele ua faailoa mo i latou uma e pei ona ta‘ua. O se tasi lea o vaega o le polokalame a le IRB o loo faapea foi ona faia i isi atunuu e 37 o le lalolagi, e saga faalauiloa atili ai le agai atu mo le isi taamaliosaga o le Ipu o le lalolagi mo le tausaga fou 2015.
Sa saunoa foi le taitaifono o le pulega o le lakapi a le lalolagi (IRB), le susuga ia Bernard Lapasset, e faailoa se fiafiaga o sui uma o le pulega, ma faafetaia i latou uma ua agavaa ma filifili i lenei vaitau, ona o lo latou sao i le faailoaina o le taaloga lakapi i le atunuu, aemaise lava le lalolagi atoa. E lē gata i le faalauiloaina o le lakapi, ae ua avea foi i latou ma faataitaiga lelei mo tupulaga fai a‘e.
