Faaaoga vailaau tape ai manulele faalafuā

Ua faaaoga nei e le Matagaluega o le siosiomaga ma Punaoa faalenatura se vailaau oona e tamate ai manulele ua taua o mynabirds o loo pisapisao i luga o pulu tetele o loo i le taulaga i Apia, ma isi vaega o le atunuu ua maua ai ia manulele faalafua ua latou faaleaga laau tau faatoaga. O le manulele o le myna bird na aumaia faapitoa e le Matagaluega o Faatoaga i le vaega o lafu manu latou te aia utu o povi sei tulou le faafofoga a le atunuu, peitai ua faalafua nei i le faaleaga o laau toto eseese e oo lava i togalaau aina suamalie ma fualaau aina taumafa mata.
O luga o faalo o fale e mafai ona sao i ai, ua tau tuufua ma nonofo ai, ma ua sesegi ma le toe vaaia ai le tele o manulele masani a le atunuu e pei o le miti, segavao, le tiotala ma le se‘u faapea isi manulele masani. O le lua vaiaso ua mavae na faaaoga ai le vai oona e fai ai maunu i le aano o falaoavela, ma fualaau aina suamalie e pei o esi, lea na mamate ai le 442 manulele o le myna.
Sa taumafai muamua i le ave o mailei i tagata e faaaoga peitai e lei manuia, e oo foi i le fautuaina o le atunuu e tape ia manulele ae maua le 20 sene i le manu e tasi, e leai foi nisi na iai se agaga e fia lagolago atu. O lea la ua faaaoga le vailaau ma ua manatu le Matagaluega o le Siosiomaga ma Punaoa Faalenatura o le a mafai ona tamate ai ia ituaiga o manulele.