Faaaoga pepa fanau pepelo, talosaga ai se Tusifolau

Ua i luma nei o le faamasinoga se mataupu ua molia ai ni tagata o se aiga i le faia o se talosaga mo se tusifolau o se tasi e le o se tagatānuu o Samoa. O lea foi talosaga na faaaoga ai ma se pepa fanau taufaasese ma o le tasi lea vaega matuia ma ogaoga o le gaioiga ua molia ai lea aiga e le o mafai ona faailoa lautele lo latou igoa e le pulega o le vaega o femalagaiga i le Matagaluega a le Palemia ma le kapeneta. Ua faaalia e le faauluuluga o le matagaluega, le afioga Auseugaefa Vaasatia Poloma Komiti, o se tasi lea o solitulafono ua matua faamamafa ona faasalaga i lalo o aiaiga o le Tulafono fou o le umia o tusifolau ma le tuuina atu o tulaga tagatānuu poo sitiseni ia i latou e le o tatau i ai le avea o ni tagatānuu o Samoa.
I le aiga ua molia i le faia o se talosaga mo se tusifolau o se tagata e le o se tagatānuu, ua faaaoga ai se pepa fanau taufaasese, na faaalia e Auseugaefa o suesuega a le vaega o femalagaiga na toe tautino ai tagata o le aiga na faia le talosaga, i lo latou faatino o se gaioiga faasolitulafono ma tuuina atu ai loa i leoleo le mataupu. O loo iai foi mataupu o loo aafia ai nisi i le toe talosaga o se isi tusifolau fou e faaaoga ai se pepa fanau o se isi tagata, aemaise lava i latou sa ova aso pe overstayer i Niu Sila, o loo aafia tele i lea faiga solitulafono.
O le faateleina mai pea o nei ituaiga o solitulafono, o se itu lea o loo faanoanoa ai nai isi tagata, i latou o loo taumafai pea ia faia mea tonu i taimi uma, ma ia le solia tulafono a le malo, peitai o mataupu faapenei i nisi taimi, ua avea foi ma itu ua faafaigata ai mo nai tagata fai mea tonu, ona toe maua ni avanoa mo nei faamanuiaga, ona ua leai se talitonuga o le matagaluega i le tele o talosaga o loo tuuina atu e le mamalu o le atunuu, ua moni ai se tasi o muagagana a le atunuu, ‘e a Ulu tafega ae selefutia ai Vaisigano’, e a isi e fai nei ituaiga o gaoioiga faasolitulafono ma le le faamaoni, ae afaina ma aafia ai nai isi tagata o loo faamaoni, pe a oo foi ina taofia pe faafaigata e le malo le faia o nei auaunaga.