E Tauaso le Alofa (13)

E momoli atu le faamalo i le mamalu o le aufaitau i lenei foi vaiaso. E iai le manatu maualuga o loo faapea ona sologa manuia fuafuaga o loo feagai ai i lenei foi vaiaso.
Faafetai i le Atua ona o lana tausiga ua mafai ai ona tatou toe aulia mai foi lenei vaitau o le soifuaga, ae alo mai loa i lau faitau, o lea o le a toe sosoo atu le tatou fagogo i lenei foi vaiaso.
Na gata mai le tatou tala i le vaiaso lea ua tea i le taimi lea sa taunuu atu ai le alii o Tala i le latou fale ma ia iloa mamao atu ai le saofai mai o le teine o Maumea i le faleoo lea e i luma ane o le latou umukuka.
Na pei e nofo le manava a le tama aua e le talitonu lona loto e mafai ona alu ane faapea le teine i le latou fale.
O le mea ua faaluafesasi ai le alii o Tala, aua ua saputu mai i lona mafaufau le mau fesili pe o le a tonu le faapogai o le alu ane o le teine.
O nei mau fesili uma, o loo taotaomia ai lava lagona o le fefe aua o loo maualuga pea i le mafaufau o le alii le leaga o lana gaioiga lea sa fai i le teine, ma e iai lona manatu ailoga a toe faamagaloina o ia e Maumea seia oo mai lona oti.
Talofa i le palaai o le tagata faufau leaga, na lilo i ona lagona e lei tauina e le teine i le latou aiga le mea na tupu talu ai o lona manatu e fia puipui pea i le tauvalea o Tala.
Na pasi le solofanua a le alii i le faleoo ona oso lea i lalo ma toe liliu mai i le vaega o loo nofo atu ai le teine. Ua fou gata se upu a Tala e faatalofa atu ai ae tei i le faalogo atu i le oso mai o Maumea. “Talofa Tala, ua foi mai lau galuega”? “O lea lava”. O le tali atu lea a le tama ma punou i lalo ae toe faapea ane le teine.
“Nofo maia i lalo sei faia sina au malologa”. Ua saofai ifo le alii o Tala i le isi itu o le faleoo ona faasasao lea o lona papatua o loo faalagolago i le pou fuafua lea e pou ai le fale, ua leai sana tala ma ua pei e sioa mo sina taimi. “Malo lava le galue alii. Ia ai ua e tei ua e tau mai o lea ou te nofonofo atu iinei a ea?” “Ioe, se ua sau le matamuli ina ua ou vaai mai ia oe”. “Ia a oso a foi e matamuli.
O le mea lena e leaga ai le amiovalea aua e fefe ai e tilotilo mai mata”. Ua leai se tala a le tama aua ua tau tonu i lona muaulu le faaupuga a Maumea lea na fai ane ia te ia.
“Se ioe Maumea, ua lagona lava lota salamo i le tulaga sa tupu mai anapo. Ae ui lava i lea, ou te tatalo atu ina ia e alofa ma faamagalo mai ita faamolemole.
Ua ou lagona lava lou sese e tusa ai ma se gaioiga sa ou faia, ae ia magalo sou faaletonu i sou finagalo faale-Atua”. “Aua e te popole Tala. Na oo lava i lou mafaufau le tulaga maasiasi e lua te faafeagai ona o le mea sa tulai mai. O le ala foi lea na ou le tautala ai lava i se mea e tasi. E oo lava i ou matua ma ou tuagane ua fiu e faamasino au pe o le a le mea na ou ee ai, ae tasi lava lau tala sa fai lau miti, ma o le faapogai lena”.
E lei uma atu le tala lea a Maumea ae togi ane le ulu a Tala ma lona le talitonu e mafai ona fai e le teine se gaioiga alofa faapea e natia ai lana agasala.
“E a ea lau faaupuga suga, o lona uiga e te lei tauina i se isi le mea sa tupu”. “Leai, ou te le valea. E fai foi o lou alofa ia te oe, ae sa ou puipui malu foi au i lou tauleleia.
O le ala lena na ou le tautala ai. Ua sili ia te au le tanu o lau amiovalea i lou loto, ae fanau mai ai le alofa e puipui ai mataga i upu ma tala a tagata”.
“Maumea, faafetai i lou agalelei. Ua leai se mea e oo i ai lou saoloto ina ua e aumai ia te au lenei ipuvai suamalie, ua galo atu ai le oona o mafaufauga pogisa sa nofo i le taele o ou totoga.
Ou te faafetai foi i le Atua ona o lona toe taitaiina mai o au i lenei itula o le aso, ae na ou faapea lava e te le toe vaai ia te au.
Na ou usu i le maumaga ma lou talitonuga e ta te toe feiloai i le lagi, ae faafetai i le Alii ona ua ia aumai le avanoa ou te toe faatoese atu ai i lau afioga ina ia e alofa ma faamagalo mai au.
Ou te tautino atu foi, e leai ma sou mafaufau e tupu le gaioiga sa ou faia anapo. Ae pei ona ua mafua lava ona o lou ita i lou teena o au.
Ui i lea, ou te le toe fia talanoa i mea na tutupu. O le mea sili o lea ua ou maua mai oe, ma e leai lava la ma se isi e onomea ma talafeagai i ai le faatoesega sei vagana ai oe. O le mea lea ia e alofa ma faamagalo mai au”.
“Tala, e te le tau faatoese mai ia te au. Ua ou masani i le olaga o faigata o loo tatou iai. Ua aoaoina foi au ina ia talia mea tiga e tutupu mai, ma ia avea lea e fai ma avanoa e aoao mai ai ni lesona lelei aua le vaai atu i le lumanai manuia o le olaga.
Ae aua e te popole ua uma foi na mea. Ana o se mea ou te le faamagaloina oe semanu ou te tauina lava oe i ou matua anapo ma ou tuagane. Ae faauma loa lena mea”.
Na fai lava tala a le teine ma tu mai i luga ua fusi atu le tama, ae o le taimi lea e leai ma se tasi o tilotilo ane i nei talanoaga.
Na ese le faalogo a le tama i ona lagona ina ua fusi o ia e le teine. Ua sualua i le alofa moni fia mafuta, ae o si ona pona, ua tasi lona talitonuga pe o le a lava se isi auala e toe taumafai atu ai ia Maumea, ua matua lapisi lava ia i le manatu o le teine.
Na uma loa ona feiloai atu Maumea ona sasau loa lea ma lana faatofa ma savali ese atu loa. E u mai le tua o le teine ae o le taimi lea ua toe saofai ifo i lalo Tala ma toe mafaufau totoa i le gaioiga lea sa fai e le teine.
Ua taoto ifo i lalo ma moeiina ona mata ona tei a lea ua maligi ona loimata. O ona uiga faigata ua tei a ua suia faafuasei, e pei o se tagata leaga ua liua e avea ma tagata lelei.
Sei tatou liliu atu i le alii o Mativa ma le la talanoaga ma le teine o Rosalia. E fai lava tala a le tama ma tago atu ua milimili le patua o le teine ae o le taimi lea ua le mautonu ai le mafaufau o le teine aua o lea ua tautino atu le solo a le tamaloa.
O lea foi ua manino mai le mata o le vai, o Mativa o loo iai lana uo teine i Samoa, aua o lea ua faaali ma faailoa uma e le tama mea uma e aunoa ma lona toe natiaina o se mea se tasi. “Mativa, e te iloa oe la‘u fautuaga, e sili ai lava ona e toe foi isi au uo o loo faatali mai i Samoa.
E moni lava i se isi itu, ae e te leiloa foi pe a tua ma ni a le nofo onosai ma le tapuai mai o si na teine latou ia. O au e le o iai sau uo ua faia i le taimi nei. O le tulaga foi e pei ona iai le alii o Taua, ou te tautino atu lava ia te oe e ma te le o feoai. Na o ananei lava sa alu atu ai piki mai au.
Ou te le nanaina foi ia te oe se mea e tasi e uiga ia Taua. O ananei lava sa fai mai ai ia te au pe mafai ona fai se ma uo, ia sa ou tali i ai e leai ona ou te musu e vave fai sau uo. O le mea lea e le suiina ai lava sau tali. E ui lava foi ona o lea e iai ou lagona ia te oe, ae e sili ai lou puipui”.
Na motu tala a le teine, ae o le taimi lea ua le mapu le mili a le alii o Mativa. “Lia, pule oe ma sau faatatau. Ae tau lava ina ia e iloaina, ua avaga lou mafaufau ia te oe.
E moni lava foi o loo iai lau uo i Samoa, ae ua faigata ona ou teena ou lagona alofa ua fanau mai i lou loto.
E le mafai foi ona ou toilalo i nei lagona ona e iai lou talitonuga e moni lava ma faamaoni mo oe.
Na pau lava le mea lea ou te faatali ai o sau tali mai ona faataoto loa lea o sau polokalame. E faigofie lava foi ia te au ona fai se fuafuaga i Samoa aua e le faapea ua ma faaipoipo ma si au uo o loo iai. O lea lava ou te fealuai saoloto au e aunoa ma se pule mai o se tasi ia te au. Ae a e alofa mai ma talia lota manao ua faataoto atu ia te oe le tamaitai faigata”.
O le fegauai o le leo o le alii o Mativa na liusuavaia ai le loto o Rosalia. Ona faigofie lea i ona manatu ona tafa i le tuualalo ma le faatauanau atu o le tama, ona faapea lea o lana tali. “Mativa, e ui lava i sou manumanu i lou tauleleia, ae o le a ou talia lou manao”.
E faia pea