“E lē ose malologa, a ua suia le auala e fai ai la’u taulaga.” O upu ia na saunoa iai Lana Afioga ile Tamaaiga, Tui Atua Tupua Tamasese Efi i lana lauga faamavae mai le tofi Ao ole malo o Samoa ile tausaga 2017.
Ole auai o lana afioga ile Tui Atua Tupua Tamasese Efi e avea ma failauga faapitoa i mataupu tau Tulafono Faavae o Atunuu ole Pasefika, ose tasi o polokalame ale iunivesite i Aukilani, sa maua ai ma le avanoa e faatalatalanoaina ai i luga ole Radio Samoa e tusa ai ma lana auaunaga i lenei vaitaimi.
Na saunoa manino le afioga ile Tamaaiga i lea faatalatalanoaga i ona tiutefai i lenei vaitau, ina ia asiasi le atunuu i lana lauga faamavae ma le tofi Ao ole Malo o Samoa, oloo faataatia ai le alafua ole isi laasaga o lana auaunaga i ona tagata.
Vaega ole lauga faamavae ma le tofi Ao
“Ole matua o la’u tautalaga, Afai oute lē manatua oe Ierusalema, ia pipii a’e lo’u laulaufaiva i lo’u gutu (Salamo 137:5-6. Samoa e, o lau tu ma lau aga, o lau mau tuufaasolo, o lou tofi ma lou faasinomaga, o lo tatou Ierusalema lea”.
“A’o foufou la’u malaga i Roma, na ou talosaga ile Vatikano ina ia maua se avanoa ma te feiloai ai ma Pope Penitio ua faamālōlō ile vaitau lea. Tainane ua faamālōlō, ae sa ou pulunaunau ma te feiloai, ona o lana faamavaega ose molimau ola lea ole loto maualalo ose ta’ita’i.”
“Ina ua matou taunuu i Roma, ua logo mai ele sui ole Vatikano na faatali maia la matou malaga, sa liuliu faalaau mamafa i la’u talosaga. Sa talia e Pope Penitito ae ua faauilavea le Vatikano – fai mai latou, a tatala nei le avanoa, e toatele foi nisi ole a moomia lea avanoa. Ma, ole a tulai mai le faaluafesasi, e foliga ua lua Pope; ona faamālūlū mai ai lea.”
“Ua lē aualā le feiloaiga ae ole a auai le Failautusi a Pope Penitito i ē faatali maia le matou malaga pe a taunuu ile Vatikano, e avanoa e faatalatalanoa ma a’u ma e mafai ona molimoli ai sa’u feau ia Pope Penitito.”
“Ina ua ma feiloai ma le Failautusi a Pope Penitito, ona ou fai lea iai, e lua lava feau oute manao ete momoli ia Pope Penitito. Muamua, oute fealuai ma lana mau tusitusia e ulutala, Ole Atua ole alofa. Lua, o lana faamavaega mai le tofi, oute manatu o lana sao aupito i tāua lea ile ekalesia. Ona ia fai mai lea, ‘What you say will make his day’.”
“Ose faafiafia loto la’u feau mo Pope Penitito. Ua faaaogā aso totoe o Pope Penitito e tatalo ai mo le ekalesia ma le lalolagi. E lē gata i lea, e faaauau ai ana suesuega ma ana tusitusiga i mataupu ole Tusi Paia ma le Mataupu Silisili. O lona uiga, e lē se malologa, a ua suia le auala e fai ai lana taulaga. Ole a’oga mo a’u, sui se isi mea e fai ai la’u taulaga”.
E iai lagona faaletagata ina ua aveesea ma le tofi Ao
Ole tali ale afioga ile Tamaaiga i ona lagona ina ua logoina o ia ole a faamae’aina ona tiute faa Ao ole Malo o Samoa. “Ole itu tāua ia te au ole fautuaga a toeaiina. Aua ne’i e aga i aga ale fafine ua melea e lana tane, ua alu ua faapea ane, ana lē seanoa a fala na ou lalagaina e leai ni fala, ana leai a le ma’umaga na ou faia e leai se ma’umaga. Ae ole mea tāua e tatau ona tu mai le mafaufau o soo se isi ua aveesea mai tofi, ia aua ne’i faoa ele ta le mafaufauga lelei. O lau fesili ile Atua, ole ā se itu e mafai ai ona toomaga le atunuu i sou lagona faaali, e pei ole taimi nei?”
I lea faatalatalanoaga i luga ole alaleo ale Radio Samoa, na aumaia ai faalua ele afioga ile Tamaaiga le ata tifaga ole Post oloo ile faletifaga ile taimi nei e fai ma faataitaiga ile malo ma le tulafono faapea tagata ma lo latou ala ile saolotoga.
Uiga oloo faaautu iai le ata tifaga ole Post oloo fai ma faataitaiga
Ole ata tifaga ole Post oloo fai ma faataitaiga ile saunoaga a Tui Atua, e faatatau ile taumafai lea ole malo Amerika e nanā a latou pepelo i tagatānuu o Amerika ile taua i Vietnam mo le 30 tausaga lea na auina ai le afe ma afe o fitafita a Amerika ma feoti ai, ona ole mamā e faailoa lo latou toilalo.
Sa taumafai le autusitala e lipotia ia mea faalilolilo i lomiga ona ua toatele aiga ua feoti o latou tagata i lenei taua, peitai sa iai tulafono e faalavelavea ai nei faasalalauga, ma e lei taofia ai le faailoa o nei mataupu faatasi ai ma le lagolago a tagatānuu, ose itu na manumalo ai le autusitala ile aiātatau e lipotia ai nei faiga pepelo oloo faalilolilo ele malo.
Ole tasi itu tāua o lea ata tifaga, e lei manatu faapito kamupani nusipepa ile totogi ole tau ole sala ile tulafono, ae na latou taimua e tutū e faailoa pepelo ale malo oloo nanā i tagatānuu e faatatau ile maliliu ole toatele o fitafita i lea taua ona o faaiuga ile lē fia toilalo.
Ole mealilo le mafuaaga na saunoa ai le afioga ile Tamaaiga ma faatusatusa ile ata tifaga ole Post, peitai ole itu manino ua suia le itu e auauna atu ai i ona tagata e ala lea ile tutū faatasi ma tagata ma faailoa mea tāua o tulafono e ao ina iloa e tagata e lē o faailoaina mai ele malo. “E lē tasi se auala e ono aafia ai le tofi.”
Na ta’ua ele afioga ile Tamaaiga, “E lē o iai se afaina tele ole tofi ile lesitalaina o fanua 2008 peitai ole tulafono na faia i tua atu ole tulafono 2008 lea oute talitonu a’u i la’u suesuega ma la’u faitau, e matuai telē le avanoa e aafia ai tofi, ae lelei lava le susū mai ole atunuu i lenei polokalame o tulafono faavae ole Pasefika ina ia o latou iloa ai lava ma o latou suesue ma fai ai a latou faaiuga poo fea o iai le tofa”.
Ole tofa tatala, ma le tofa fetālai a lana afioga oloo ia aumaia e faalaeiau ai i tagata Samoa ina ia toe asiasi ile faavae ole atunuu. Ona e lē gata e tāua le mau ae tāua foi le iloa soosoo mau ina ia sootai la tatou mau ma le mau tauave a o tatou mātua.
Ole Aso Lua ma le Aso Lulu, 13 & 14 o Fepuari 2018 ole a faatautaia ai lenei fonotaga i lona vaega muamua (Pacific Law, Custom & Constitutionalism Conference Series). Ma oi latou nei ua lautogia i lenei faamoemoe i mataupu eseese auā le faamalamalamaina. Afioga Tui Atua Tupua Tamasese Efi, Dame Tariana Turia, Ida Malosi, Polofesa Tony Angelo, Dr. Jenny Te Paa Daniel, Vitolia Mo’a, Fiu Mataese Elisara, La’ulu Dr. Lalotoa Mulitalo. Ole a faataunuuina lenei faamoemoe ile Iunivesite o Aukilani 26 Wynyard Street ile itula e 6:30ile afiafi. E $45 le ulufale e aofia ai ma le meaai ole afiafi.
Ole a maua se otootoga ma mataupu o le fonotaga oloo auai mai ai lana afioga ile vaiaso fou.
