E ese ai lava le Manu Samoa i ‘au uma o le lalolagi – Sailosi Tagicakibau

O le auai muamua o le uigi muamua a le Manu Samoa ia Sailosi Tagicakibau i taaloga o le tutoatasi i Sini, na maualuga ai le faamoemoe o lenei tausaga.
Na malaga mai o ia e asiasi mai i aiga i Sini nei ma fetaui tonu ma le tauvaga taitoafitu o le Fu‘a lea na taalo mo le Pacific Exiles o se ‘au na auai ai tama Fiti  Samoa ma Tonga. Na sue siamupini ma Penrith ma manumalo ai Penrith e 15-10 i le taimi faaopoopo.
Ae peitai na mataina le ese ai lava o le taalo matagofie a Sailosi i le tauvaga atoa. O se tasi lenei o tama iloga ua faaavanoa lona taimi e taalo ai mo le Fu‘a.
E tolu Ipu o le lalolagi o tautua ai Sailosi mo le Manu Samoa faapea ma le sikoa silia i le tauvaga i Peretania o loo taalo kalapu ai. I le Ipu o le lalolagi 2011 na fetaui ai ma lona uso ia Michael lea na taalo mai ia Fiti.
O le taaloga i le vaiaso na tea nei na taaalo ai ma lona uso laitiiti ia Sireli Tagicakibau mo le Pacific Exiles. I se molimau a Sailosi o le Manu Samoa e ese mai ai lava i ‘au uma o le lalolagi auā e ausage ae taumafai. E taaalo mo aiga, nuu ma alalafaga faapea le tapuaiga a le atunuu.
Na saunoa Sailosi e lē faatusalia le tamaoaiga o isi atunuu ma le Manu Samoa aepeitai e lē o tupe mea uma o lenei soifuaga. O le tele o taimi e ofo lava taimi ma tupe a le Iuni ma tama mo nisi taaloga ma e lē faamamulu ai.
O Sailosi o lona tina o Lealofi Tapusoa mai Faala Palauli a o lona tamā o Tagicakibau mai Fiti. Saunoa Sailosi o le loto finau o le Samoa e mafua mai i lona tuputupu a‘e. “Ou te manatua lava ai o matou tina e pei lava o tina Samoa e a‘oa‘o matou i le olaga faapea feau ma tiute ae a oo foi i le taimi e faatonu ai e sasa ma faatamoe faataamilo solo i le fale.”
O lesona ia e malosi ai le finau ma oo atu ai lava i le Manu Samoa. O le vaiaso lava lea na manumalo muamua ai Samoa ia Sikotilani sosoo ai ma Italia.