E alofagia se tama usitai ma faalogo e lona aiga

E ui ina manatua e le alii o Tasi Wilson ua oo mai i le aso e faamanatu ai lona 21 tausaga, peitai e oo mai lava i le taeao o le Aso Toonai e tele ina tuu i ai faamoemoe o aiga, e le o vaaia lava pe tau vavala mai ni ata o se tapenaga o lona aso fanau.
E oo foi i nisi o ana uo sei tau pisapisa ane se isi peitai na matua faateia o ia ina ua ulufale atu i totonu o se faleaiga sa faataunuu ai le faamoemoe ua matuai faatumulia mai i ona aiga ma uo aemaise lana aulotu, le Aiga Samoa  i Logan City.
O lea tapenaga faalilolilo sa saunia lava e si ona tuafafine o Rona ma si ona uso o Carl Wilson ona o se tama talavou usitai, toaga e faigaluega ma loto alofa ae sili ai ona uiga tausaafia e le tele o tagata aemaise e lima taumatau i ai nai ona tuaa i le tele o mea manaomia e pei ona silafia lenei vaitaimi.
O le Aso Toonai aso 7 o Setema na faamanatuina ai lona 21 tausaga. O ona mātua o Len Lomiga Wilson mai Moataa, ma si ona tina o Susana Fouvale Wilson mai Faala Palauli ma Vaegā i Satupaitea.
O le Peresiteine o le Aiga Samoa i Logan City, le susuga ia Mata‘afā Tareta Hakula Siakisini na feagai ma le sauniga lotu faamanuia, ae o lona uso o Carl Wilson sa fai ma fofoga o le aso.
O le keke o le aso fanau sa faaaogāina lava lanu o lana tamai pisinisi o loo taumafai i ai ua faaigoaina o le “YOR HEALTH”.
Na auai uma ona aiga mai Satupaitea (Lepua family), ona aiga mai Faala Palauli (Ah See), Farao, Tuia families ma na matuai foi ma le mama ua lomi ma le vaa ua goto i le tele o taumafa.
Manuia lou 21 Tasi Wilson, alofaaga mai ou aiga ma uo faapea le Aiga Samoa i Logan City faasilisili mai ou mātua, uso, tuafafine, cousins, nephews, aunties ma uncles ma aiga uma i Samoa, Niu Sila ma Ausetalia.