E faafeiloai atu i le agaga faaaloalo i le paia ma le mamalu o Samoa i ona tulaga faalupelupeina.
E amata mai i mauga maualuluga e oo i mauga iti. E iai le talitonuga o loo laugatasia uma i tatou i le agalelei o le Atua. I nai vaiaso o lumanai o le a o tatou talatalanoa ai i se tasi o fesili ua tuuina mai e uiga i le auala lelei e tatau ona faaoloaina ai le auauna a le Atua poo le faifeau.
O le a mafai foi ona fesiligia nisi o auauna a le Atua i o latou finagalo i lenei tulaga ona eseese auala o loo faaaogāina i ekalesia e tausi ai le faifeau ma lona aiga. Ou te talitonu o se tulaga lelei tele lenei mataupu ona o nisi o faiga poo auala sa masani ai lo tatou tutupu a‘e i Samoa ua suia ina ua tatou taunuu mai i nei atunuu ese ma aumau ai.
E iai nisi o faiga poo auala o loo faia i Samoa e talafetaui lava le soifuaga i Samoa aemaise o le siosiomaga faalenuu ma afioaga o loo aumau ai le faifeau.
Peitai i totonu o Niu Sila ma Ausetalia poo Amerika foi, e iai suiga ma tulaga ua lē talafeagai ai faiga lelei o loo faia i Samoa, ma e ao lava ona tatou saili le auala sili ona lelei ma talafeagai ina ia faataunuuina le finagalo o le Atua ma le a‘oa‘oga a le Tusi Paia i le tausia o le taitai o le lafu mamoe.
E tatau ona tatou matamata ma a‘oa‘oina i tatou i le taiala i totonu o le afioga a le Atua ina ia fesoasoani ia i tatou ina ia faia le tulaga lelei mo le faifeau ma lona aiga.
O itu nei e lua e tatau ona tatou mataituina:
O nisi o ekalesia e ese le tausi faifeau. E mata uma mea lelei mo le auauna a le Atua. E lē gata o taumafa i vaiaso taitasi, ae e iai ma le fale o le faifeau e nofo ai le faifeau ma lona aiga, ae totogi e le ekalesia le mokesi.
E maua ma le taavale e tuuina i le faifeau e fealuai ai. E aoina le peleti poo le alofa mo le faifeau.
O malaga uma a le faifeau e faatupeina uma e le ekalesia.
Peitai o nisi o faifeau e lē mauaina lea ituaiga o faamanuiaga faaletino.
O loo tausi e le faifeau le ekalesia ae o loo faapea foi ona faigaluega o ia poo lona faletua ina ia totogi lo latou fale ma faaaooga tamaiti.
E lē tele se tupe maua i vaiaso taitasi mai le ekalesia. E leai se fale o le faifeau, ma e seēseā foi ona malaga le faifeau ona e lē mafai e le ekalesia ona faatupe.
O le vaiaso nei o le a ou ta‘ua ai nisi o faiga o loo faia i totonu o Ekalesia e faaoloaina ai le faifeau.
O nisi o nei faiga o mea ua leva ona sau ai nisi o ekalesia mai lava i Samoa. E iai le faamoemoe o le a maua foi le avanoa e faasoa atu ai i nisi o vaega faaletulafono ina ia mataala ai le tele o Ekalesia, ina ia faia le tulaga fetaui e tusa ma le tulafono a lenei atunuu.
Auala eseese o loo faaoloaina ai le faifeau
1. O nisi o Ekalesia e fai le alofa o le faifeau ta‘i lua vaiaso pe ta‘i masina foi. O se faiga lelei tele lea mo le faifeau pe afai e toatele ma malosi le tamaoaiga o le ekalesia.
Peitai o le faifeau na te tausia se
ekalesia toaitiiti poo se ekalesia tau amata o le a telē se āfaina ona o le a utiuti le faasoa.
O se tasi o tulaga e ono avea ma faafitauli i lenei faiga, o le ono avea o le naunau o le faifeau i le lelei o le tupe maua mai le alofa, ma auala e musu ai pe fefe ai foi le faifeau e soona faia ni faaiuga pe fai ni suiga fou e ono avea ma auala e lē fiafia ai tagata. Auā a oo ina lē fiafia le ekalesia ua tau leai foi se foai i le faifeau.
2. O nisi o Ekalesia e sao le aofaiga o le tupe e lafoina e aiga taitasi i masina uma. E tutusa pau uma lava le tupe e aoina mai aiga taitasi.
O se tulaga lelei lea mo aiga e toatele tagata faigaluega. Peitai o nai aiga o loo ola i le penefiti ma lē lava le tupe maua o vaiaso taitasi, o le a avea le alofa o le faifeau ma mea mamafa.
Ou te talitonu e lē fea pe e lē talafeagai lea faiga mo aiga taitasi auā e lē tutusa uma le malosi tau tupe o aiga. O nisi aiga e toatele tamaiti.
O nisi aiga ua na o le tina ma le fanau ae ua leai se tamā. A o nisi aiga e faigaluega uma le tamā ma le tina ma nisi o fanau matutua.
3. O nisi o Ekalesia e fuafua le tupe maua a le Faifeau i le aofaiga o le taulaga o Aso Sa taitasi. O le pasene o le foai i Aso Sa e tuuina lea i le aao o le faifeau mo lea vaiaso.
O le faataitaiga afai ua malilie le ekalesia o le a tuuina i le aao o le faifeau le 50% o le taulaga, o lona uiga a toatele le ekalesia ma tele le foai, o le a faapea foi ona telē le pasene o le tupe maua a le faifeau.
Ou te lagona e lē talafeagai lea tulaga. Silasila foi, o le auauna a le Atua e lē o se faatau taavale e maua lona totogi i le komisi o taavale taulia.
E tele lava faaletonu o lenei faiga o loo faia ai e nisi o ekalesia. Muamua e ono faaosoosoina le faifeau e lauga i lauga mālie, ma faafiafia i tagata auā a lelei le lauga ua fiafia tagata ua lelei foi le foai ma telē le komisi a le faifeau i Aso Sa taitasi.
Ae o le galuega faifeau e lē fuaina i le lauga. O le lauga ua na o le 30 minute i Aso Sa taitasi.
O nisi o faifeau e na o le 15 minute e lauga ai. O le tele foi o tagata e fiafia i lauga pupuu ina ia vave tuua le lotu .
Manatua o le galuega faafaifeau e fai lava si tele, e lē lelei le tamaoaiga o le faifeau ae tatau ona ola mativa, o inā e iloa ai o ia moni lava o le tagata o le Atua. O se manatu faavalevalea lea tulaga se‘i tulou.
Afai e lelei ia te oe le taumafa lelei ma mautu lou aiga e faapena foi le faifeau ma lona aiga. Manatua foi o le uluai ekalesia a le faifeau o lona aiga ae lē o le ekalesia.
Faaauauina i le vaiaso a sau
Faamanuia atu le Atua.
Soifua
Lui Ponifasio
