E lē o tuumāmāina ele tamaitai faiaoga ia Faapito le tuufaatasiga o nai ona tei, matutua atu ia te ia ma a latou fanau ae o fanau a fanau. Ole Aso Sa na tea nei na faia ai foi le latou faatasiga i lona maota i Vaitele-uta. Ole auga ina ia mafai ona mafuta a latou fanau, faamasani ma ia iloa e tamaiti o latou tupuaga.
Peitai e faamatala lava Faapito ile tele o avā a lona tamā ma ‘ata, “Se ole toeaina e matautia. Auā e toeititi lava tutusa uma le matutua o tamaiti mai fafine nei e 18 na usugafa iai”.
E afua, ona o le toeaina sa fai lana faatoaga, ma sa fai foi ana aufaigaluega. O ana tagata faigaluega o tamaitai. Ae o lena faatoaga, e aofia ai fa‘i, niu, fualaau‘aina, tapaa, koko, ma le tele o isi laau sa maua ai tupe i na vaiataimi na totō uma ele toeaina ia Fili.
Na talanoa Faapito, “oute lē mā lava e faamatala lenei toeaina. Auā a oo ina alu galuega ale aufaigaluega, e oo atu loa i uta, ona tala loa lea ole tuaa a teine poo fafine foi i vaega eseese ole faatoaga.” O isi e o ile poloka ole koko, ole poloka o niu, tapaa, talo, taamu ma isi, ma faapena ai lava ona tufa solo le aufaigaluega, e aofia ai ma le tina o Faapito ole tamaitai Avao lava.
I lana tala “o iina tonu lava lea e lavevea ai tamaitai ile toeaina. Ai pe tofi si o‘u tina ise isi vaega ae ua uma ona iai lona mafaufau ise teine e faalavea.”
Ole tala a Faapito o aso na o laititi, o ia lava e leo fale ma le isi ona tei. “E toalua tamaitai Avao na usugafa iai le toeina. Ae o isi ana fanau i isi tamaitai, e toeititi lava tutusa uma le matutua o tama ma teine e lalata lava ile 70 tausaga.”
Ua tusa ole 67 ai lenei ole matua o Faapito. Sa faapea lava ia, ai o ia ole uii ile fanau a le toeaina. Ae te‘i ua toe maua foi le isi ona afafine ile tamaitai Fagamalo ile tausaga e 1970, ole uii lena o lana fanau.
O tamaitai na maua ai le fanau ale toeaina e aofia ai le Auala, e tasi lana tama, Sataua e tasi, Asau e lima, Paia e tasi, Avao e lua tamaitai, e lua le fanau ale isi ae tasi le isi, Satoalepai e tasi, Faga e tasi ma le tamaitai Saoluafata i Upolu e lua.
Na ta‘ua e Faapito ole vaega lea ole faletama a lona tamā ua mafai ona faamaopoopo ile taimi nei, ae oloo taumafai pea fesootaiga mo le isi 9 o faletama ale toeaina.
Ole 90 ole toeaina na faatoa maliu ai, ae ose toeaina finau, sogasogā e atinae le aiga, ma faafiafia lana fanau. O tamaiti uma nei mai fafine e to‘a 18 lea o loo taumafai ai nei le tamaitai faiaoga o Faapito e tuufaatasi ma fai a latou mafutaga.
Ua tele tausaga o ia faiaoga, ae ua tele foi taimi e “ta te te‘i lava ua alu atu se tagata ile faleaoga, ma faapea atu, o ia mate aiga, o lona tamā lo‘u tamā.”
Na toe faasolo i tua manatunatuga ole tamaitai faiaoga o Faapito, ma ia manatua ai le taimi faatoa faiaoga, i lona tausaga muamua 1962. Na amata lona totogi ile na ole $10 ile lua vaiaso. Sa faapea soo atu lona tamā ia te ia, poo ā na ituaiga o totogi.
Na oo ane ile taimi ua malolo litaea mai le malo, ma le galuega faiaoga ile tausaga e 2013, e na ole $18 afe ile tausaga lona totogi na maua.
Peitai ile taimi nei ua toe valaau ele malo faiaoga litaea e toe talosaga atu pe a fia faiaoga pea. Na toe apalai Faapito ma toe galue faafaiaoga mai ai nei talu mai le tausaga 2015 ile totogi e na ole $15 afe ile tausaga.
Faatusa i faiaoga talavou ua iai nei, oloo galulue ile tai $21 afe ma le sili atu foi. Peitai ile molimau a Faapito, o nisi o na faiaoga talavou totogi tetele oloo iai nei, pe na ose $10 se tupe mamā e maua e ave ile fale, ma unaia ai faiaoga e aitalafu tupe, fai loans, oi ma pologa i le lē lava o totogi.
Peitai o si ana $200 lea e maua ile lua vaiaso, e faifai mālie, faatasi ma tupe faamomoli mai fafo i fanau, ae o ana fanau i Samoa. “E maua lava le isi totogi e lei uma le isi ona totogi.” Ua toe faiaoga ai nei, Faapito ile aoga tulagalua a Vaimea. O lona manaoga, ia faaauau lava ona galue auauna faafaiaoga ile mea e gata ai lona malosi.
Sa faaipoipo foi ile alii faiaoga ma asiasi aoga, na galulue i Savaii ma faasolo mai ai i Upolu nei, le susuga a Lafi ma Faapito.
Peitai o lona faanaunauga o iai nei, ole taumafai lea e aoao mai fanau o faletama e 18 a lona tamā, ina ia latou faamasani ma mafuta a latou fanau ma ia fealofani.
