O loo tumau pea ona olaola le miti a le afioga a Toaletai David Tua, ina ua mae‘a lana taumafaiga i le po o le Aso Lulu i le Trust Stadium i Aukilani Sisifo, e toe fia fusu i le Fusi o le Lalolagi i se aso, ina ua manumalo i le alii Nigeria o Ahunanya Friday the 13th, e ui e le o le iuga lea sa matemate le toatele o le tapuaiga a le atunuu o le a oo i ai le taaloga.
E le o le faaiuga foi lea e masani ai le maimoa a le toatele i le Tuaman peitai, i le tulimanu lava ia a Tua, na matua iloga le fiafia ona o lea ua iloa nei ma silafia e le lalolagi e fiafia i le faagatama o le Faipelega, e mafai e Tua ona malo i le tui oti poo le KO, e mafai foi ona manumalo i le faauma lelei o taamilosaga, ia ma ua lava foi lea e silafia ai le tulaga o le malosi o loo i ai le alo o le atunuu.
O le manumalo o Tua i lea afiafi ua faaopoopo ai le faatulagaina o ana malo i le 51 (43 KO) 3 faiaina ma le tutusa e tasi, ae o loo tumau pea le fesili, poo ai lea o le a sosoo nei, ae poo afea foi la o le a fusu ai le alo o le atunuu i le Siamupini.
Na vaaia i le po o le aso Lulu le galue malosi o Tua i taamilosaga uma o le taaloga, i lona taumafai malosi lea e saili se auala e faavave uma ai le alii uli o Friday, e ui lava i le ‘alo poto o le alii ma lelei foi lana sola, faatasi ai ma le lē mafai ona faatamala pe pau lana tali i le agavale o Tua, ae na maua lava nai masele na maua lelei ai le manava ma maua ai nai ‘ai o Toaletai.
I faaiuga a alii Faamasino e toatolu ma a latou score cards, na mamao ai lava le sili o ‘ai o Tua i taamilosaga uma i le 119 – 109, 117 – 111, ma le 120-108, ma toe tumau ai ana fusi e lua o le WBO Asia Pacific ma le Oriental Heavyweight Belt, ae le gata i lea o lona tulaga tolu ai i le faatulagaga a le WBO lea e numera muamua ai le alii o loo umia le Fusi o le Siamupini o le Lalolagi i le taimi nei, o Wladimir Klitscko.
Ae mo le alii o Friday ua faaopoopo ai le isi faiaina e tasi i lana lisi lea ua ono ai nei malolo mai le 33 fusuaga talu mai le lua tausaga.
O loo iai le avanoa e toe faatoai ai sana lu‘i (rematch), ae na saunoa le alii o loo faalauiloaina fusuaga a Tua, Cedric Kushner, o le isi lea ana galuega tele o le a feagai nei ma ia, o le sailiaina lea o se tasi e talafeagai lelei ma Tua ma vave ai se isi ona avanoa lona lua i le Fusi o le Siamupini, e ui i se saunoaga a Luis Tapia e muamua fusu ai lana tama o Friday.
O loo ua faailoa foi le lē malilie o le tulimanu a Friday aemaise lana faiaoga ia Luis Tapia, ma tuuaia ai le faaituau o alii faamasino ia latou sikoa, na ia faaalia foi e faapea, e 15 valaau na ia mauaina mai Amerika ma ta‘ua ai le malo o Friday, o nisi o ana saunoaga na ia ta‘ua ai, ana o Amerika lea na fai ai le taaloga, e mamao le malo o lana tama ia Tua.
Ae o le masani lava lea o mea faapenei, e malolo loa tele le mau lapisi felauai, ae o lea lava na molimauina le lē solomuli o Tua ma tele ana ‘ai i taamilosaga uma.
I se lipoti mai le vaega na nafa ma le faatautaia o le faamoemoe i le po o le Aso Lulu, le Duco Events, na taua ai e tusa ma le $200,000 NZ lea na maua e Tua ma lana Pulega i le fusuaga lea, ae e manaomia nisi fusuaga se lua e tusa ma le feagaiga ma le Maori TV, sei vagana ua iai se isi maliliega e mafai ai ona see atu loa mo Amerika, e pei ona faailoa e Kushner, o Hawaii le nofoaga lea e tau latalata mai mo Tua, ma e tatau ona maua ai sana paga i le isi lua masina o lumanai.
E manatu eseese lava foi le toatele o le atunuu i le iuga o le fusuaga, e le gata ia Niu Sila atoa, ia a o le tapuaiga foi a si o tatou lava atunuu, e tofu lava foi le tagata latou ma lana faaiuga e tusa o lana maimoa.
Peitai i le Samoa Times lava ia, e le suia lava le talitonuga maualuga, o loo tumau pea le lelei, le malosi ma le agavaa o le afioga a Toaletai David Tua, ma e le mafai lava ona tineia le lamepa o le faamoemoe, e sau lava mālama o le taeao fou.
E faamalo atu ai i le tapuaiga a le atunuu. Malo tatalo, malo papale, sili ai le faamalo ia Tuaminator, malo le tau ma le lotonuu.
Ua moni ai lau saunoaga i lea afiafi, ‘Samoa e, tatou aeae ia lea manu ua ulu’. Manuia lou alo faiva uso!
