Ua lipotia le aveesea uma ai o tofi o se tasi o faifeau o le ekalesia Faapotopotoga a le Atua le Assembly of God i Samoa e mafua i ni tuuaiga faasaga i le faifeau ona o aafiaga o ni tamaitai ma se tina o se aulotu sa galue ai lea auauna faauuina mo le faafaileleina o le ola faaleagaga o le lafu mamoe.
Ua faaalia e se sui o le ekalesia i se lipoti a se tasi o nusipepa, o le mae‘a o le fono faaletausaga a le ekalesia i le lua vaiaso ua mavae na faia ai ma le faaiuga o lea faifeau, lea ua talai ona ofutau faaleagaga ma aveesea uma ai ona tofi.
Ua ta‘ua foi ua tuua Samoa e lea auauna sa galue i le galuega ma ua malaga i se atunuu e lē o faailoaina lautele. Faaalia e le faalapotopotoga o le Toomaga o Tagata Puapuagatia, e toaiva ni tamaitai na aafia ua maua i sailiiliga lea na mafua mai ina ua sulufai le tasi o tamaitai i le faalapotopotoga mo se fesoasoani.
O loo iai ni tuuaiga e faapea sa faaoolima matagā lea auauna faaleagaga ia i latou na aafia e amata mai i le tausaga e 2002, ma o le tamaitai laititi na aafia ai e na o le 12 tausaga le matua. Faaalia e le sui sooupu o le Matagaluega o Leoleo ma Falepuipui, le afioga Leaupepe Fatu Pula, e lei faia ni moliaga ae afai ua malaga ese ma Samoa lē o loo tuuaia, atonu o le a fesoasoani le vaega o leoleo faavaomalo le Interpol mo le sailia ma toe aumai i Samoa mo le faia i ai o ni suesuega atili e tusa ai ma ia tuuaiga.
O loo faatali nei le valaauina o se isi mataupu e aafia ai se isi faafeagaiga mai le ekalesia EFKS ona o moliaga o le faaoolima matagā. O le vaiaso fou i le Aso Lua, 22 o Iuni 2010 o le a iloiloina ai e le Faamasinoga Faaitumalo le talosaga a le loia a lea faafeagaiga mo le faasāina ona faasalalau faalauaitele o le suafa o lē o loo molia.
O loo faatulaga o le aso 22 o le masina fou Iulai o le a valaau ai molimau a lē sa avea ma faifeau o le EFKS. Ua 68 tausaga o le soifua o lē o loo molia ae 30 ma ona tupu tausaga o le tina na aafia.
