Ua lē tafa, a ua faauliulito pea le finagalo, ma ua lē suia foi le faaiuga a le Aki-Epikopo o loo nafa ma le vaaia o le Matagaluega a Ueligitone a le Ekalesia Katoliko.
O lana faaiuga e soloia ma aveesea tofiga o Faifeau Fesoasoani mai ekalesia Samoa e sefulu sa galulue ai mai tausaga e tele ua tuanai, ua faamautu ma ua aloaia talu mai le vaiaso na tea nei.
E faavae le faaiuga a le ta‘ita‘i i lona talitonuga e faapea, ua lē usitaia e Fesoasoani ma ekalesia taitasi e pei ona ta‘ua, lona finagalo ma vaega sa ia tali ane ai i nisi o mataupu sa lāgā e le itupa Samoa. E lei mamao tele atu sa lipotia ai e le Samoa Times le tulaga sa feteenai ai le faaiuga a le Aki-Epikopo ma le Matagaluega Samoa.
E lei taugamalie ma faaofigofie i finagalo ma manatu o ta‘ita‘i ma tagata lautele o le Matagaluega, saunoaga ma faaiuga sa faia e le ta‘ita‘i e uiga i nisi o mataupu sa manaomia ai se tali.
E tele fesili sa fesiligia ai le ta‘ita‘i ona o ana faaiuga sa faia, peitai e lei mafai ona faaleo ni mafuaaga, ae tasi le tali na faamatuu ane o le fofogaina o lana faaiuga e lē toe suia.
E pei ona silafia ma manino, o le Aki-Epikopo e faitoatasi lava lana pule ma lana faaiuga. Peitai na saunoa le taitaifono o le itupa Samoa, ua manino lelei lava lea tulaga, peitai e lē faapea o le tutoatasi o ana faaiuga, ona soonafai ai lea ma faafitafita ona fai isi foi ta‘ita‘i ma tagata lotu o loo i lalo o lana taitaiga.
E ui ina ua savalia nei i le tolu vaiaso talu ona fofogaina lea faaiuga a le ta‘ita‘i, peitai sa maualuga pea le talitonuga o le itupa Samoa, o loo iai pea lava se avanoa e mafai ai ona toe fetuunai pe toe suia ai lea faaiuga. E lei te‘i foi le tofa ma le faautautaga i le taitaifono, ma le mamalu o le Matagaluega, e tusa ai ma le faalauiloaina o lea faaiuga.
Sa toe savalia ma faia pea le galuega mo le sailimalo a le itupa Samoa, ma toe tatalo i le Aki-Epikopo, pe iai se isi avanoa e toe tatala ai lana faaiuga.
O le Aso Faraile la tea nei, na toe faia ai se feiloaiga a itu e lua, ma ua faailoa mai ai e faapea, ‘Ua leai lava se isi avanoa peitai ua faatumauina pea ma faamamalu le faaiuga ua mae‘a ona faia’.
O le faatumauina o le faaiuga a le Aki-Epikopo ua solomuli ese ai nei ma le itupa Samoa mai lana pulega faata‘ita‘i. O lea tulaga o le tali lea e saga tapue ai le faatumauina pea lava foi o le talitonuga ma le finagalo tutufaatasi o le itupa Samoa i le latou mau e pei ona momoli i ai muamua.
O le afioga lava i le taitaifono o le Matagaluega a Ueligitone, le afioga ia Taala Rapiti Samoa, sa fai ma sui e tali fuaitau i le Aki-Epikopo.
O le tali a le taitaifono, sa ia fofogaina ai foi ma le faaiuga ua tasi i ai le Matagaluega a le itupa Samoa, e faapea o le mutaaga foi lea ma le faaiuga o le latou mafutaga, i lalo o lana taitaiga, ae o le a solomuli ese ma faaauau pea lo latou soifua auauna mo le Atua.
O le Aso Lua, aso 15 sosoo ai ma le faaiuga o le vaiaso, sa faamautuina ai le faaiuga, sa maua ai le avanoa e feiloai ai ma le Taitaifono o le Matagaluega Samoa, le afioga ia Taala Rapiti Samoa. O le finagalo faaalia o le taitaifono, na ia faamalamalama atili ai le uiga o le finagalo ma le manaoga o Samoa, sa mafua ai ona feteenai ma le finagalo o le ta‘ita‘i.
Afioga Taala Rapiti Samoa (Taitaifono Matagaluega Samoa Ueligitone)
Ua matou talia ma le faaaloalo le faaiuga ua saunoa i ai le ta‘ita‘i, o le faatinoina o lea faaiuga, ua matou tuua ai ma o ese mai i lana taitaiga. E lē o se teena o lona finagalo, peitai o le faatinoina o la matou foi pitolaau ina ia tapuai saoloto tagata o le atunuu.
O lana faaiuga ma ana tofiga sa faia, ua matuā lē ogatasi lava ma le tulaga masani o le Ekalesia Aoao. O lona tofia o se tasi e leai se tofiga faafaifeau, ae ona pulea i latou ua filifilia e le Atua e galulue i tofiga, ua lē sao ma ua matuā sese lava.
E lē mafai la ona matou auauna sese ai pea, auā ua faavaatuia ai ma le ola tautua ma le soifua galulue o tagata lotu.
E tele naua ni faaiuga ua atagia ai le faia faaituau ma le faapitotasi o le finagalo o lo matou ta‘ita‘i. Ua leva foi ona matou onosai ma faaaogāina pea le ava ma le faaaloalogia o lana nofoaiga ma lana taitaiga, peitai e foliga mai e leai sona faatāuaina o le soifua auauna o tagata Samoa, o loo lailoa i le galuega ma tautua i le ekalesia.
E tele lava itu ou te fia talanoa atu ai, peitai o le aotelega lava o le matou mataupu, o le tuua o lana taitaiga, ae matou saili matou i se auala fou e faaaogā ai faifeau Samoa, ma tofiga Fesoasoani e pei ona ia faaleaogāina. A fua i le iva masina o matou nonofo pea ma onosai i faiga faamalosi a le Aki-Epikopo, ua manatu ai ua tatau lava ona fai se faiga, ua umi foi o lē mautonu le Matagaluega, pe o i luma pe agai i tua, ona o le matautia tele ma le malosi o le pule tutoatasi a lea ta‘ita‘i.
Samoa Times
Ae faapefea le tulaga na malaga mamao mai ai le tama i Samoa, le afioga ia Alapati Mataeliga.
Ou te manatua sa malaga mai le taitai i Samoa, ona o le finagalo alofa ma le tulaga faataitai i le isi taitai, aemaise o le va ma tagata Samoa, ina ia fofo alamea le mataupu. E lei iai se ai o lea malaga faapitoa mai a le Aki-Epikopo mai Samoa.?
Taala Rapiti Samoa
E moni lelei lava, o le mafuaaga tonu lea na ala ai ona faatosotosololoa, ma faaumiumi sa matou faaiuga fai. Sa vaai ma silasila totoa lava ma le alofa i le tama mai Samoa, ma lona malaga mai ona o le manao malo. E pei ona ta‘ua muamua, e lē gata ina faaumiumi sa matou faaiuga, ae sa toe tatalo pea, ma tu‘itu‘i pea i le faitotoa o le ta‘ita‘i i Ueligitone, ina ia toe tatala ma toe liuliu lana tofa.
Peitai e foliga mai e matuā lē amanaia lava e le ta‘ita‘i o Ueligitone le tuualalo ma le tatalo mai a le isi foi uso a ta‘ita‘i e pei ona malaga mai ai Alapati. Ua leai lava se isi faiga, a ua faia pea ma manao e faataunuu lana faaiuga, lea la ua agai ai ina aliali ma tulaga lē manuia la matou mataupu.
E tele lo matou āva ma le manatu i le finagalo saili malo o le ta‘ita‘i mai Samoa, peitai e aliali mai e lē o afea i le silasila a lea foi ta‘ita‘i, ma ua alagatatau ai lava ona faia loa sa matou foi faaiuga. Atonu o le matou o ese mai, o le a toe maua ai se isi finagalo fou o le ta‘ita‘i, ma toe fuafua lelei ai nisi o ana faaiuga mo le lumanai.
Samoa Times
O le ā le isi laasaga lea o le a oo i ai la outou fuafuaga mo le taimi nei? O faapefea le aufaigaluega ua faamalolo nei ma le soifua lautele o tagata lotu?
Taala Rapiti Samoa
O loo manuia uma lava ma o le manatu e pei ona faaalia, o le finagalo foi lea o le aufaigaluega ma le mamalu o tagata lotu. Ua matou vaavaai nei i se amataga fou, ina ia talafeagai ma le manaoga o Samoa lava latou ia, aemaise ai ina ia faaauaau pea ona faaaogāina tofiga o Fesoasoani ma Faifeau e pei ona aveesea faamalosi e le Aki-Epikopo.
O le naunautaiga lava, ia maua e tagata le saolotoga e tapuai ai i le Atua e ala i le faaaogāina pea o ana tu ma ana aganuu e faaopoopo i le viiga o le Atua. O faiga lava ia o loo faaaogāina foi e le tele o Matagaluega ma ekalesia taitasi, e pei foi ona iai Aukilani latou ia. O loo faatino uma lava faiga faapea, o tu ma aga faa-Samoa o isi ia o auala e faatino ai tapuaiga ma le ola tautua.
O le uiga moni lea sa matou tatalo ai i lo matou ta‘ita‘i, ina ia faaaogāina ma faatinoina i la matou foi auaunaga. Peitai o lona talitualimaina ma le gauai, ae tali mai i le faia o faaiuga sese, ua mafua ai ona feteenai ma tupu le vevesi.
Ae o le a logo atu lava, ma faailoa atu le laasaga ma taualumaga o lo matou faamoemoe mo le lumanai, pe a mautu ma faataoto ona fuafuaga. E faamalulu atu foi i le faafofoga ma le faitau mai a ta‘ita‘i o le Ekalesia ma tagata lotu, i soo se vaega o le lalolagi, i se maitau mai ma le tulaga ua oo i ai lenei itu. E lē gata i lea a o le silasila ma le tapuaiga foi a le mamalu o le atunuu.
Ia tatou maua pea le toafilemu mai le Atua, e faasino mai ma faailoa mai le ala moni e savavali ai lana fanau.
