E toa 18 tagata faigaluega a le Malo na faauu mai le Iunivesite a le Pasefika i Saute (USP.
Na faatumulia le Maota o Tupulaga Talavou EFKS i Mulinuu, i mātua, aiga ma uo a i latou na faauu.
O le 17 o i latou ia e eseese Matagaluega a le Malo o loo galulue ai.
Peitai, o le avanoa na latou maua e maua ai a latou Tusipasi i mataupu tau i le auaunaga lautele (Public-Sector Management).
E tasi le tausaga na faatautaia ai lea mataupu i totonu o le Iunivesite ma o le Afioga ia Mata‘afa Dr. Desmond Amosa sa nafa ma le faatautaiga o lea polokalame.
I le amataga o lea polokalame e pei ona ta‘ua e le susuga i le faiaoga, Susuga Mata‘afa e faapea, e 20 i latou na auai i le polokalame i le amataga, peitai e toalua na toe faamaamulu ona o ni mafuaaga lē maalofia.
Na ta‘ua e Mata‘afa o le polokalame o loo i lalo lava o le Iunivesite, peitai ua faaopoopo i ai ma le polokalame fou lea o le PICPA.
O le faatautaiga o lea polokalame e pei ona ta‘ua e Mata‘afa e tai ono masina i le mataupu.
O le polokalame o loo agai i le aoaoina lea o tagata faigaluega a le Malo, ina ia siitia atili ai le latou auaunaga aemaise o le faatautaiga o galuega, ina ia faamalieina le auaunaga o loo faatino, o le faaopoopo lea a Mata‘afa.
O le mae‘a ai o le faauuga a le Iunivesite na agai mai ai le aufaauu i le Ofisa o le PSC, i le feiloaiga ma le Malo o Ausetalia.
O lea feiloaiga na momoli ai le faamalo a le tamaitai Hai Komesina o le Malo o Ausetalia, Susuga Sue Langford ia i latou uma na tausinio i lea polokalame.
O se laasaga fou e pei ona saunoa le tamaitai Hai Komesina, o le siitia atili o auaunaga a tagata faigaluega e tali atu mo soo se auaunaga e fia moomia, lea o loo tulimatai i lea polokalame.
Na maua foi le avanoa e momoli ai le faamalo a le Taitaifono a le PSC, Afioga Tuuu Ieti Taulealo i le au faauu o le polokalame o lenei tausaga.
“Malo onosai, malo tauivi malo foi le tau.”
E mo le silafia e le atunuu, o lea polokalame o loo galulue faatasi ai le Malo o Ausetalia ma le PSC i le filifilia lea o i latou e aoaoina i lalo o lea polokalame.
E pei ona iai i latou ua faauuina, lea na momoli ai le agaga faafetai o le Afioga i le Taitaifono a le PSC i le Malo o Ausetalia tau ala atu i le tamaitai Hai Komesina, ona o lea avanoa tāua.
O Matagaluega a le Malo o loo iai a latou sui i totonu o lea polokalame e aofia ai le Matagaluega o Faamasinoga, Matagaluega o Tupe, Okika (Audit), PSC, Matagaluega o Tupe Maua ma le Matagaluega o Pisinisi, Alamanuia ma Leipa.
O lea polokalame o se taimi muamua lea ua faatautaia ai, ma o loo iai le naunautaiga o lea faiga paaga ina ia faaauau mo lenei tausaga fou ma tausaga o mulimuli mai.
E toa 20 lava sui mai Matagaluega o le Malo e mafai ona aoaoina i totonu o lea polokalame.
I se upu mai le aufaauu, na momoli ai le latou faafetai e lē gata o le PSC aemaise o le Malo o Ausetalia o loo latou faatupeina lea polokalame.
