O le mataupu sa tulai mai i Brisbane i Ausetalia i le Ekalesia Mamona, ua taofia ai e taitai o le Ekalesia le lotu Samoa o loo faatinoina i le gagana Samoa. O le tulai mai ai o lenei faafitauli i totonu o le aiga lotu, sa le mafai ai lava le finau o se tasi o tina matua o loo galue ai I totonu o le Ekalesia o le taumafai lea e finauina le toe faaauau pea o le sauniga i le gagana Samoa.
O le tina ia Iliafi Maila Vaele ua 84 tausaga o lona soifua sa tu malosi e finauina le mataupu lea sa tulai mai I totonu o lona loto i fale i le Ekalesia Mamona. O lenei faafitauli ua avea o se mataupu e faatauaina e tagata o galuega lelei a matua. Aua poo le a lava le taleni ae ana leai le taumafai a lenei tina e le mafai ona lalaga ni vaega lelei ua tau taotaomia i taitai o le Ekalesia.
O le tina ia Iliafi Maila Vaele e leo atoatoa le malosi o lona tino, e fealuai i le wheel chair, ae ui i lenei faigata ae lei faatafa le tina, ina ua taofia e papalagi lona faaaogaina o le Gagana Samoa i totonu o sauniga lotu i le Ekalesia Mamona. O le tina sa taulamua i le lalaga pea o lenei mataupu, poo fea lava e oo iai, pe mativa, poo le maua o sana tupe, e taumafai lava ia faaaoga lana Gagana. O le fiafiaga sili i le toatele o tagata o le iai o ni matua faapenei, o loo taofi ma faataua le Gagana Samoa. Ua maitauina foi ua amata ona oo mai i totonu o Niu Sila lea faafitauli i totonu lava o lenei Ekalesia, ua le gata i le Gagana Samoa ae ua oo foi i le Gagana Tonga, faatasi ai ma Gagana a isi atunuu ae faaaoga na o le Gagana faaperetania.
O le saunoaga a Iliafi e ese le leaga ma le le fetaui o le taumafai atu o lana tatalo i le tatou Gagana i le va o ia ma le Atua ae sau le papalagi taofi, ma fai mai e sau se faamatala upu e faamatala i lana tatalo, ma faamatala i lauga o loo fai, ae le o le uiga lea o le lotu i a te ia, o le taua o le lotu o le va o ia ma le Atua. Ma e fia faalogologo foi i fetufaiga a taitai I le Afioga a le Atua.
O le loto tele ma le le fefe o lenei tina ua avea lea ma auala ua toe faafoi uma mai ai Gagana Samoa i Ausetalia ma o lea ua taofi ai ma le taumafai o le lotu Mamona e aveese le Gagana Samoa ma Niu Sila. O le mitamitaga o le tina ua mafai ona toe faaaoga lana gagana, ua le sili ia te ia le alu o ana tupe ma le taugata o loia ae o lona naunautaiga ia tapuai i le Atua i le gagana Samoa.
Tainane ua taunuu uma vaega na taumafai iai le tina ae o loo iai foi nisi o faafitauli ua toe aliae mai i nisi lava o tagata Samoa ua fai tonu e lei uma ona totogi pili i nisi o papalagi sa latou tauaveina faalua lenei mataupu i le ofisa o faamasino ma le manuia.
O le taumafai mai o le tina ia Iliafi i se fesoasoani a le afioga i le tamaitai loia ia Leuluaialii Olinda na maua ai se faamama avega mo ia e ala i lenei mataupu, aua sa taumafai e fia feiloai i le afioga i le Palemia i Samoa mo se fesoasoani ae o le faafitauli e le mafai ona fealuai. Sa faigofie mea uma ina ua maua le aveai mai ia Leuluaialii Olinda ma alu ai se savali I le Palemia o Samoa ma faamalamalama vaega uma o le mataupu, ma sa matuu mai ai se finagalo o le Palemia ma saunia ai se tusi faatasi ai ma le tusi a le loia e auina sao atu i Utah i Amerika ua mafua ai ona toe maua le Gagana Samoa i totonu o le Ekalesia.
O le tutu faatasi ai o tagata Samoa i lenei mataupu ua toe lalaga ma lagona ai le leo o le Gagana Samoa i totonu o Brisbane Ausetalia, e pei ona taulamua ai le tina ia Iliafi Maila Vaele, o le Palemia o Samoa ia Tuilaepa Sailelemalielegaoi, o le afioga i le loia ia Leuluaialii Olinda Woodroffe faapea se tasi o alo o le atunuu o loo galue I totonu o Amerika Samoa le susuga ia Vicent Haleck, o loo maualuga lona tulaga i Amerika i tagata Pasefika.
O le agaga fiafia ma le loto faafetai i galuega lelei a matua, ia aua nei faagaloina, ia faatauaina ia tatou Samoa o mea tatou te maua poo le a le fita ma le faigata e mafai ona o le tutufaatasai o tagata Samoa.
