“Le Lupe na Fofoa i Vaoese”
E ui ina ua tele auaunaga ma ua alu atu foi tausaga o tautua mai le tele o nisi o Kamupani i le tuufaatasia o ata tifaga, peitai o le taimi muamua lenei faatoa faalauiloa mai ai i tua se tasi o ata lauiloa o lenei foi vaitau sa tuufaatasia e le Vision Pictures Ltd, ua faaigoaina o “Le Lupe na Fofoa i Vaoese”. O lenei ata sa pueina e le susuga ia Vili Leilua Ieru faapea ma le tofa ia Tupai Faasalafa, ma o i laua lava foi sa o la faatonutonuina le tuufaatasia o lenei ata mai lava i le amataga seia oo ina faamae‘aina.
I se feiloaiga ma le susuga ia Vili Leilua Ieru na ia saunoa ai ua leva lava ona mafaufau e fia tuufatasia se ata tifaga, peitai sa tuu atu pea i le Atua ina ia maua ni ona mafaufauga lelei ma le atoatoa auā le faatinoina o lenei moemitiga. O se ata sa fafau i ao ma po seia oo lava ina maua le feiloaiga ma le tofa Tupai Faasalafa, ma o la galulue faatasi ai loa auā le faataunuuina o lenei matatia.
O le ata lenei e iai le talitonuga o se tasi o ata iloga i lenei foi talutalu fou ona o le matagofie o le tala ma le feau o loo afifi mai ai. O se tala e uiga i le alii o Vaimoli sa faapea ona fanau mai e lona tina, ona nofo lea o le tamā o lona tina, ma ave i le isi tamaloa e fai ma ona atalii ona o lona lē manao ina ia iai se sootaga ma le aiga o le tama sa fanau ai
lona afafine.
Peitai mulimuli ane sa lofia Vaimoli i ni upu na taia ai lana faalogo ma oo ai se tiga i lona loto, ma o ia upu na fai lea ma taiala o lona toe foi atu e feiloai i lona tina moni.
O se tala faamomoi loto ona o loo fausia lava i le soifuaga moni faasamoa. O loo atagia mai ai le faafitauli o loo faafeagai pea ma aiga Samoa i le taugata o le soifuaga, o le tuli o fanau mai aoga ona o le lē totogiina o le pili, o le talatama o mātua i fanau, ma le soifuaga sogasoga ma le atiae o tagata Samoa aemaise ai lava o le lio o mātua ina ia maua se manuia o fanau. O se ata o loo momoli mai ai se aoaoga aogā ma le tāua i soo se tamā, tina, tama ma le teine Samoa.
Na faaalia le agaga faafetai a le susuga Vili i le Atua ona ua mafai ona tino mai lana miti ma e tusa ai ma lana saunoaga, e tele lava nisi vaega o loo silasila i ai auā foi nisi ata mananaia mo le faamalieina o le silasila a le atunuu.
O le susuga Vili Leilua Ieru o se tasi lea o tamalii e lē toe tau faailoaina i le atunuu ona o lona sao i le taleni o le musika.
Sa avea o ia ma tama pese i le aufaipese a Tama Nofoalii, seia oo ina tuufaatasia ma tama o le Tiamaa ma na faatoa motusia lea mafutaga ma le Tiamaa ina ua malaga mai i Niu Sila nei. Sa lei nofonofo le saili a le tagata sailimalo ae na faalautele lona tomai ma naunau ai i se falepue pese e pei ona lauiloa ai le Vision Recording Studio sa pueina ai le toatele o alo ma tamafanau a Samoa.
O le taimi nei, o lea ua faalautele lana tautua auā le pueina o ata tifaga, e pei ona iai le ata lenei o “Le Lupe na Fofoa i Vaoese”.
O le vaiaso na tea atu nei sa faatauina ai lenei ata, ma e silia ma 300 kopi o lenei ata sa faatauina i tua i aso e lua na uluai faatau ai.
O se tulaga lelei lea e pei ona saunoa i ai le susuga Vili, peitai e iai le talitonuga o le a matuā toatele nisi o le a faatauina lenei ata ona o lona matagofie tele.
Na ta‘ua foi e Vili, o lenei ata ua uma ona pasia i Samoa e le Ofisa o loo pasiaina ata tifaga, ma ua faatauina atu foi i tua i lalo o lana kamupani o loo ua tuufaatasia nei ma le tofa Tupai, ua faaigoaina o le Vision Pictures Ltd, lea ua mae‘a foi ona resitalaina i Samoa.
