Ia outou saili i le lelei ae lē o le leaga, ina ia ola ai outou, ona iai lea ia te outou o Ieova o le Atua o ‘au e pei ona outou fai mai ai. (Amosa 5:14) O le faatāuaina lava o le faimea lelei ma le loto ia lelei. E nofo saoloto le tagata loto lelei ae pologa le tagata e leaga le loto.
O ni upu faalaeiau ia o le feau na momoli mai e le failauga faapitoa, le faletua ia Puataunofo Levae (Taitai), e ‘auga tasi lava ma le lesona na folafolaina e le faafeagaiga ia Misa Luao Matai‘a i le polokalame o le aso faapitoa o le Sosaiete Fesoasoani lea na faataunuuina i le Sapati, aso 8 o Novema.
Na faamamafaina e le taitai, e ao lava ona faalaeiina tina uma i le agalelei, agamalu, loto maualalo, loto mamā ma faatāua pea le loto faafetai.
Mo le silafia o le Toreka sa igoa ai le vaega o tina a le ekalesia i le lalolagi atoa, lea ua tele ina lauiloa i le taimi nei i le Sosaiete Fesoasoani. O le latou matafaioi o le agalelei atu ma fesoasoani i ē o mafatia ma moomia le fesoasoani.
E lē faatuaoia nei galuega lelei, ma ua molimauina i Samoa le tuuina o le tele o meaalofa i maota gasegase aemaise le Mapuifagalele o iai tamā ma tina matutua.
O le ofisa o le Soasaiete Fesoasoani a le Ekalesia Aso Fitu Samoa Tutoatasi a Kuiniselani, o le faafeagaiga o le susuga ia Misa Luao Matai‘a, Taitai le faletua ia Puataunofo Levae, Fesoasoani le faletua ia Tamara Fuesaina, Failautusi le faletua ia Teualilo Vaeluaga, ma le Faatamā o Ma‘inifo Kalauati Faamaile.
O le Taitai o le Matagaluega a Kuiniselani o le susuga ia Pr Lagolago Levae faatasi ai ma le faletua ia Puataunofo Levae lea o loo avea ma Taitai o le Sosaiete Fesoasoani.
E toafā le aufaigaluega faifeau, Pr Famalologa & faletua ia Tamara Fuesaina, Pr Johnny & faletua ia Fitulua Siofele, faapea susuga i faafeagaiga ia Foa Fanolua & faletua ia Merry Vaeluaga ma Misa Luao & faletua ia Emo Matai‘a.
