Asiasi mai le Tuamanator mo aso e tolu

A o tapena Sini i faigapalota o le vaiaso nei na taunuu mai i laufanua le alo iloga o Samoa mai Aukilani ia Toaletai David Tua mo se asiasiga na o le tolu aso mai le Aso Faraile i le Aso Sa.
Na faaalia e le uo mamae a Tua ia Lawrence Tauasa lea na faamautu ai Toaletai, o lea malaga a Tua o se tafaoga puupuu e malolo mai ai i ana polokalame koleni e sauni ai mo lana fusuaga ma le alii Rusia ia Alexander Ustinov lea ua tolopoina mo le aso 16 Novema 2013 talu ai se manu‘aga i le vae o Tua.
Na saunoa Lawrence Tauasa i le Samoa Times, “O le Aso Faraile na taunuu mai ai le uso ou alu atu e faatali ma tafafao i lo matou pitonuu ma talatalanoa i ana tapenaga e faafetaui lenei alii Rusia maualuga toe malosi.” E pei ona silafia na masani mai lava i laua nei faatoa malaga ane o latou aiga i Aukilani mai Samoa ma taufai koleni ai loa e faipele ma faataitai lea taaloga o le fusu.
A manuia le taaloga a Tua ma manumalo ia Ustinov lona uiga o le a maua se avanoa e lu‘i ai le fusi lea e ia Klitscko.
O se miti ua leva na momoo i ai lenei alo iloga o Samoa ma o se taimi tāua tele aso e tolu ia na malaga mai ai i Sini e faasoa ma iloilo i ai auala e ono ausia pe a manumalo.
O le po la o le Aso Toonai na asia ai foi e laua le po o Fusuaga i Homebush lea sa molimauina ai le taaalo o nisi o tama Samoa i faipelega e pei o le Alii o David Levi na manumalo i le tu‘i oti o lana paga Maori na la fetaui.
O se molimau a Tauasa i le Samoa Times na ia saunoa ai, “O la‘u vaai i tapenaga a le uso ua matuā lava sauni a Toaletai e fua i le malosi o lona tino ma le tapenaga faalemafaufau.
Na feiloai atu foi nisi e faaaogāina le fale koleni o Tauasa i Sunblest Avenue i Mt Druitt ia Toaletai David Tua. E le galo i le tapuaiga a Sini le maoae foi o le sao o Tua mo Samoa ma i le taunuu atu o Tauasa ma Tua e piki sa la taumafataga Samoa i se tasi o faleaiga Samoa, na matuā lolofi atu tagata e faatalofa ma feiloai atu i nei siamupini o Samoa ma tapue foi o latou ata.
Sa faagaeetia foi le alii pule o lea faleoloa ma faimeaalofa ai mo se taumafataga mo i laua ua asia la latou pisinisi ma feiloai atu i le aufaigaluega.
O le aoauli o le Aso Sa na toe taliu atu ai Tua i Aukilani e faaauau ana koleniga ae toe tapena foi Lawrence mo lana fusuaga lea atonu e fusu ai muamua i paga faaopoopo i se fusuaga autu a Tua ma le Rusia.