Ole tamaitiiti talavou ia Uili Papalii, 11 tausaga e aoga ile Manurewa Intermediate, sa faate’ia ona mātua ia Julianna Roberts-Papalii ma Namulauulu Keremete Papalii ina ua valaau ifo le aoga ia i laua, pe mafai ona la auai ile tauaaoina atu ole pine auro faapitoa i lo la alo o Uili Papalii.
Ta’ua ele tina ia Julianna Roberts-Papalii, o laua late lē iloa faatasi se mea na faia e lo la alo, ua mafua ai ona ia maua lenei faaaloalo faapitoa i totonu ole aoga.
Ole tamaitiiti lenei o Uili Papalii e aoga ile aoga tulagalua a Manuwera sa ia fafagaina se tamā e 59 tausaga le matua, ua leai se mea e nofo ai, sa nofonofo i luma o faleoloa i Leabank i Manurewa. Ona ia ave lea iai ole tupe o lana meaai ile aoga i taeao uma pe a usu. Ole tamā ia Rob Millar 59 tausaga, oloo feagai ma faigata i lana ulugalii, ua aveesea foi lona fale faapea lana galuega, ole mafuaaga lea ole nofo i luga ole auala.
Ta’ua e Uili Papalii ina ua fesiligia ele sui ole Samoa Times, poo le ā se vaaiga na ia vaaia ile taimi muamua na ia iloa atu ai Millar. Na tali Uili, “Oute alu atu o la e faanoanoa, oute iloa e alofa le Atua ia Millar”.
E lei gata ai ii le galuega alofa a Uili na faia i lenei tamā e 59 tausaga le matua, ae sa ia faaauauina mo le 2 vaiaso. Ole tuuina atu lea o lana meaai faapea le ta’i $5 tala ia Millar e aunoa ma le fai ise tagata. Na faatoa maua ele aoga le tala ile agalelei o lenei tamaitiiti 11 tausaga ia Uili, ina ua oo ifo Millar ile aoga e faafetaia le agalelei o Uili Papalii ia te ia, ma fafagaina o ia i ana meaai.
Sa lipotia foi e lenei tamā 59 tausaga ile Nusipepa ole Herald ma tuuina atu ai le tala ile agalelei o lenei tamaitiiti ma faapea atu, “O ia sa pa’ū atu ile lua, peitai ua laveaia o ia e Uili ma toe maua ai lona ala ise isi faamoemoe fou.”
Ina ua lipotia lea tala i luga ole Herald e faatatau ile galuega alofa a Uili, na ta’ua e le tamā ia Millar ua toatele nisi ua afe ifo ma talanoa ia te ia, faatasi ai ma le galuega vali fale ua ofoina atu e se Tamaitai mai le West Auckland faapea le mea e malolo ai. “Ose itu lelei na amata mai e Uili ma a’oa’oina ai le toatele, ina ia aua ne’i faamasino atu ile vaaiga faaletagata, ae ia alofa i soo se tasi ma fafaga,” e pei ona lipotia ele nusipepa ole New Zealand Herald.
Na ta’ua ele tina ia Julianna ina ua fesootai ma le Samoa Times, “Ua matuai faate’ia lava ma’ua ma le tamā ole aiga ina ua ma oo atu ile aoga, ae faamatala mai le mafuaaga ole maua e Uili o lea Faailoga (award). Ona e leai ma se tala na talanoa mai ai Uili ia i ma’ua e faatatau ise tagata o ia aveina iai lana meaai.”
“Ole agaga fiafia ia i ma’ua ona ole ma a’oa’oga lea ile ma fanau e to’a 6, ina ia ola alolofa i soo se tagata. O Uili foi e mate faamoemoe iai e vaaia nai ona tei laiti ma fesoasoani mai ia ma’ua i feau.”
“Ole agalelei o Uili ile tamā 59 tausaga ile auala ma fafaga i ana meaai e aunoa ma lona ta’u maia ia ma’ua, e ui ina faate’ia ai i ma’ua, ae ose itu oloo atagia lava ile ola o Uili i totonu ole matou aiga”.
Ole faaiuga ole tausaga na tea nei, sa filifilia ai Uili ile sefulu pito i luga o tagata na fai ma faataitaiga lelei ma lauiloa, na lipotia ile nusipepa ale New Zealand Herald. E ui e lei manumalo mai le sefulu na filifilia e avea ma tagata faapitoa o Niu Sila ole 2017, ae ole fiafiaga ole tina ia Julianna, “Ole mea tāua, ole mafai ona fesoasoani Uili ise tagata ma avea ma a’oa’oga i soo se tagata ina ia aua ne’i tau ole alofa ile upu ma le tala, ae ia faapea foi i galuega”.
“Oute faafetai foi ia i latou na filifilia le tala e uiga ia Uili ma lona agalelei, e fai iai le filifiliga ale Herald mo le faailoga taualoa ole 2017. Ole The Black Ferns na manumalo i lea faailoga taualoa, ae ose tulaga maualuga pea ua faia e lenei tamaitiiti talavou e 11 tausaga ma lona agalelei, ua fai ma faiaoga ia te i tatou uma”.
O nisi nei na aofia ile to’a sefulu pito i luga na faia iai le filifiliga mo le faailoga tauoloa ale Herald 2017 (award) Adrew Field, ose taulealea na ia laveai ni tamaiti ole ono tausaga, iva ma le sefulutasi mai se faalavelave tau taavale na maliu ai lo latou tamā. Zoe Brock (model/actress) ile talaaga o lona olaga.
Ole aulakapi a tamaitai ole Black Ferns, o Kristine Bartlett, ose tina matua na finau atu ile malo mo se siitaga o totogi o tagata tausi soifua mo tagata matutua. Ose talosaga ua amanaia ele malo ma manuia uma ai le silia ile 55,000 o tagata faigaluega tausi soifua mo tagata matutua.
Ole au alovaa failā ole Team New Zealand le tasi na fai iai le filifiliga, faapea le faatonu ole ata tifaga ole Thor ua lauiloa ile lalolagi le alii o Taika Waititi.
“Ose tulaga maualuga lea sa filifilia ai le ma tama o Uili, ose fiafiaga tele lea i o ma loto ma le tamā ole aiga,” saunoa ai Julianna.
