O le mamafa o aoaoga e feagai ma leoleo faatoa ulufale i le galuega o le tulafono. Peitai e seasea ona afea ai le mataupu i aiātatau a tagata soifua. Na pau le vaega e mafuli ina manatua ai e leoleo le aiātatau, o le taimi e taofia atu ai se tagata i se solitulafono ona ave lea i ai o le fautuaga i aiātatau ona filifilia lea o lē ua masalomia, pe faafesootai muamua sana loia a o lei faia le galuega a Malu o le Malo.
O le tele foi o nisi moliaga e toe finauina e se loia le afaina o le aiātatau a le tagata ua molia ona sa iai se lape o le faatinoga o le tiute o leoleo. Ona o le tele o mataupu ua tutupu ma aliali mai ua afaina ai nisi o aiātatau a tagata ona o le galuega a leoleo, ua manatu ai le ofisa o le Komesina o Sulufaiga ua nafa ma le suesueina o ni faasea i le aafia o aiātatau, e aoaoina lelei leoleo o le suiga fou o loo aooga nei, i le mataupu o aiātatau.
Faaalia e le sui sooupu o le Matagaluega o Leoleo le susuga Su‘a Muliaga Tiumalu, o se mataupu e ese le tāua i le faatinoga o le latou galuega pe a malamalama lelei leoleo. “Ioe o se tasi lea o vaega tāua i le galuega faaleoleo ae a lē malamalama ai, o le a tutupu ai nisi faaletonu mulimuli ane”.
O le finagalo o Su‘a na ia toe faamanatu ai nisi o mataupu ua oo i le faamasinoga e pei o se alii Nigeria na nofo i le vaaiga a leoleo ae na afaina ana aiātatau ona o le faatinoga o le pitolaau a leoleo. E pei ona silafia na oo i le faamasinoga le mataupu lenei ma faamaonia ai le tagi a le alii Nigeria na afaina ana aiātatau. E telē se vaegatupe na poloa‘iina e le faamasinoga le ofisa o leoleo e totogi i lea alii ua toe faafoi i lona atunuu.
“O le faatinoga foi o le galuega i lo tatou atunuu e ese le tāua ai o le iloa e leoleo o le vaega lea, aemaise i le taimi e agai ai leoleo e faatino se tiute i nofoaga faitele, o tiute i le faia o se suesuega o se solitulafono, ma tiute o le vaaia ma le puipuia o meatotino a tagata lautele”.
O le masina o Oketopa e mae‘a ai le aoaoga a leoleo fou e to‘a 23 ua talia mo le vasega fou o Malu o le Malo. Ua iai le talitonuga o le susuga Su‘a e oo atu ina mae‘a le aoaoga ua faaaupegaina alii ma tamaitai leoleo fou i ni tomai e mafai ai ona latou faia le galuega i se tulaga maualuga i le silafia lea o tulafono ma lona faamalosia ma le puipuia ma le va nonofo ai o leoleo ma le lautele o le atunuu i mataupu o le aiātatau.
