O le maketi o fua o faatoaga ma isi oloa i Fugalei, o le nofoaga aupito sili ona tumutumu i aso uma i Samoa nei. E fai o le au faatau ae o le toatele foi ua feiloai ai ma ua taumafa se ‘ava ae talanoa le mau mataupu faalenuu, faalelotu ma faale-Malo.
Ua avea foi le tumutumu ma auala ua lotolotoi ai ma le au solitulafono. E lē ‘asa se vaiaso ma taofiga a Leoleo i le Maketi i Fugalei ona o le toatele ua maua le faatau ai o le fualaau faasāina o le mariuana.
Ua mautu foi le Ofisa o Leoleo i lea itu o le taulaga. O nisi la o faatau oloa ma le au faipoloka i le Maketi ua molimau mai le amata ona faatuputupulaia o le numera o tamaitai e faia uiga faatalitane ua agai atu i le Maketi.
Faaalia e se tasi o tina e suafa ia Sili‘a Tafili/Too na amata vaaia lava nei tamaitai i le tausaga na tea nei, ai o le taimi tonu lea na tutuli ese ai ma taofia e Leoleo. O lea la e foliga mai ua faamaopoopo i afiafi taitasi i vaega eseese o le maketi ua talanoa ai a o lei taape.
O nisi foi na ta‘ua e Sili‘a ua agai atu lava nisi o alii Saina o loo galulue i konekarate fau fale o loo faatinoa nisi o galuega tetele i Apia, ma o ese faatasi ai ma nei tamaitai. Ta‘ua e Sili‘a o le toatele lava o tamaitai e sili atu i le 20 tausaga le matutua ae ua mautinoa o nisi e laiti atu.
“Ua iai foi ulugalii e fai a latou poloka ma faatau a latou oloa i le maketi ua vaaia le faasoa atu o a latou fanau teine i nisi o nei alii. Na ou talanoa i se tasi o teineititi faapea e na o le 15 tausaga le matua ae na ia ta‘ua e fai e ona mātua ia uiga auā e moomia le tupe e faatau ai se suka ma isi manaoga,” o se faaalia lea a Sili‘a.
“E toatele isi teine fou ia ua vaai atu ua iai i le potopotoga lenei, e ese mai i teine tuai ia na aofia ai tamaitai na taofi e leoleo i le tausaga na tea nei,” o se faamatalaga lea a le tina ia Sili‘a. “Ou te masalosalo lava i le matutua o isi teineiti ae ua amata foi ona lē misi se po o agai ese ai ma isi tamaitai ia ua masani ona vaaia le faia o ia tulaga.”
Ua ofo atu foi e lenei tina galuega e fesoasoani ai nisi se toalua o tamaitai nei i lona faleoloa. “Ae tusa pe ave i ai galuega nei, e agai lava i le po pe a omai tamaloloa nei,” o lana faaaliga lea.
O le molimau foi lea a nisi o tina e fai a latou sefe meataumafa i le Maketi lava ma nisi o loo fai a latou faleoloa i le nofoaga lava lea i Fugalei. Faaalia e nisi, o le aso atoa e lē vaaia ai tamaitai nei, ae malu ane loa le afiafi amata loa ona gasolo atu i le Maketi ma faatalitali teisi ai a o lei amata ona savavali agai i le ogatotonu o le taulaga o Apia.
O le tausaga na tea nei lea na tulai mai ai le uluai faamasinoga na faia faasaga i ni tamaitai na masalomia le faia o nei ituaiga galuega. Sa taofia e Leoleo ae na toe faaleaogāina uma moliaga faasaga i nei tamaitai ona o le faigata ona avane molimau auā e tatau i alii ia e agai ane i nei tamaitai ona molimau ma faamaonia faiga nei.
Ona pau lava le galuega lea ua faia e leoleo o le feoai solo i nofoaga ia na faamautu ai ia tamaitai e siaki i po uma poo ua toe potopoto ai. O nofoaga ia e aofia ai luma o le NPF, luma o fale kalapu, o le fanuatanu a le Katoliko i Saleufi ma nofoaga o togatogo i Mulinuu.
E lei toe iai foi ni faamatalaga ua lagalagā poo toe iai ni tamaitai ua taofia e Leoleo, ae o lea la ua foliga mai ua agai i Fugalei ia tamaitai.
O Samoa, e lē o iai se tulafono e taofi ai faiga faatalitane, ae e iai tulafono faasaga ia i latou e faatutū fale e faia ai uiga faatalitane ma e iai foi tulafono faasaga ia i latou e tapa auaunaga faapea i Samoa.
“E taumafai lava e fesoasoani i nei tamaitai ae e foliga mai e lē o iai lava se isi galuega e sili atu ia i latou”. O se suesuega lata mai a le Faalapotopotoga o le Soifua Manuia o Aiga uma o Samoa ua maua ai le tusa ma le toatasi i tamaitai uma e toatolu ua maua i gasegase pepesi ona o feusuaiga.
O se tulaga matautia lea i le va nonofo ai o le toatele o ulugalii i Samoa ae faato‘ā maua lava le toatele pe a agai atu tina maitaga e fai suesuega ma siaki. E aofia ai i le numera o tamaitai ua aafia o i latou ua faia nei ituaiga galuega ma o loo unai lava le Family Health poo le Soifua Manuia o Aiga Samoa ina ia mafai ona tuuitiitia nei ituaiga gasegase ua aafia ai tamaitai ma alii i Samoa nei.
O le tasi lenei o popolega tele a le Family Health, o i latou o loo faia nei galuega auā e pepesi ai loa faamai e mautinoa e lē na o le toatasi le tagata e aafia ai ae aafia uma atu ai le isi anoano o le atunuu.
