Amata galuega o le faleaoga a le Toomaga

O se alii papalagi ua mautu lona manatu e mafai ona ia suia olaga o le fanau o loo sulufai atu i le Toomaga mo ē Puapuagatia ua faatupeina le galuega tele ua amata nei i Tuanaimato.
O le faleaoga fou lea mo fanau o loo aoaoina i lalo o le polokalame fesoasoani a le Toomaga mo ē Puapuagatia.
O lenei aoga o le a aofia uma ai aoaoga mo fanau i le maualuga lea e ta‘ua o Aoga Tulagalua (Primary School), o aoga maualuluga (Secondary School) ma aoga e a‘oa‘o ai fanau matutua i matata eseese.
O le faaaliga a le Peresetene o le To’omaga mo ē Puapuagatia, o le fanua lea ua faamatuu mai e le Malo i autafa lava o se tasi o fale ua faamautu ai fanau ma mātua ua sauāina lea ua amata ai lenei galuega.
O le taimi lenei o loo faaaogā potu tuai o le Ofisa o Faamasinoga, auā le faatautaia o aoga mo fanau nei o loo vaaia i lalo o le polokalame fesoasoani a le Toomaga mo ē Puapuagatia.
Faaalia e Lina Chang ua iai le manaoga e faaauau ia aoaoga i se nofoaga mautu ma ua tele taumafaiga ina ia iai se nofoaga faapea ae o lea la ua tino mai.
O le alii la lea ua aumai sana seleni mo lenei faleaoga o se tasi o le toatele o tagata ma faalapotopotoga ua aumai o latou tau‘au e faamāmā avega ai i lenei faalapotopotoga ma le latou galuega ua faaauau ona ofo atu i fesoasoani eseese mo le atunuu.
O le fanau lava ia ua vaaia le toatele ua aofia i le fesoasoani lenei a le Toomaga mo ē Puapuagatia, e lē gata i fanau ua nonofo ma vaai e le faalapotopotoga, ae ua faapea foi ona vaaia le fanau ua lē o toe agai i aoga masani ona ua tele tausaga o faatau oloa solo i le taulaga ae lē aga‘i i aoga.
Na taumafai le Toomaga mo ē Puapuagatia ina ia unai tamaiti nei e toe foi i aoga a le malo peitai e lē umi lava le taimi e iai ae toe sosola ese ma o lea la ua finau le Toomaga ina ia agai atu ia i latou mo ia aoaoga ona o le manumanuga i fanau nei aemaise o le tulafono ua iai nei e lē o toe faatagaina ai lava se tamaitiiti ona nofo i le fale ae ua lē aoga.
O le faafetai a le To’omaga mo ē Puapuagatia o le alofa o lenei Samaria agalelei ma le toatele o Samoa ua pulupululima faatasi e faatino lenei galuega tele mo fanau nei e sulufai atu mo se fesoasoani.
O le isi lua masina ua fuafua e faatautaia ai lea galuega e pei ona ave i le konekarate o le Schwartz Construction Limited.