O le Ekalesia Aso Fitu o le Toe Afio Mai Aso Toonai ua tusa ma le fā tausaga talu ona momotu ese le fesootaiga ma le Ekalesia Aso Fitu o le toe Afio mai a le atunuu lea e iai lona nofoaga tutotonu i Lalovaea.
O se ekalesia ua see ese talu ona suia le aso i Samoa ma agai ai loa le ekalesia tele e faamamalu le Aso Sa o lana sapati mo ana tapuaiga.
O le ekalesia lenei ua iai lona nofoaga tutotonu i Vaivase-uta i le Vaimauga, ua faaauau ona tapuai i lalo o taitaiga a le Aso Fitu o le Lalolagi peitai ua faamamalu pea le Aso Toonai e tapuai ai ma faia ai lana sapati.
O lea la ua iai le isi laasaga na molimauina i le po o le Aso Sa lea faatoa mae‘a atu, o le faalauiloa ai o le faatuina o lana Kolisi Faafaifeau.
O le mae‘a lea o feutagaiga na agai mai ai ni taitai o lea Ekalesia mai i Ausetalia e galulue faatasi ma taitai o le lotu i Samoa nei ina ia faatino ma faamautu.
O le kolisi faafaifeau ua amata i ni aoao se toafitu na faauu uma i le po o le Aso Sa sa faatautaia ni aoaoga faale-Tusi Paia i Samoa. O le faamoemoe o le aoga faafaifeau ina ia mafai ona ausia e aoao le tusipasi (certificate), o le tipiloma (Diploma) ma le tikeri (Bachelors) i le aoaoga faale-Tusi Paia.
A o lei faatuina le aoga faafaifeau lenei o i latou ua tausinuu i lalo o lenei ekalesia o Newcastle i Ausetalia sa malaga i ai ana aoao mo aoga faale-Tusi Paia ma faauu mai ai mo le galuega faafaifeau tausinuu ae o lea la ua iai lenei aoga o le a lē toe malaga ai aoao i fafo mo lea faamoemoe.
O lenei aoga na malaga faapitoa mai ai ni Polofesa mai fafo auā lona faatinoga. Na saunoa le Alii Polofesa ia Dr Edmund Parker, o le aoaoga e lē muta, o se galuega e faaauau pea, e tusa poo le ā lou matua e lē gata ai le aoaoga ma o le auga foi lea o le faatinoga o lea aoga faafaifeau ina ia faaauau pea mo le lumanai.
Na faatautaia se sauniga tele mo le faauuga ma le amataga o lenei laasaga o le aoga faale-Tusi Paia i le nofoaga tutotonu lea e i Vaivase-uta ma na auai uma ai sui o le ekalesia i Samoa ma atunuu i fafo, o aiga ma paaga a i latou ua faauuina aemaise le ekalesia ua agai ane e lagolago lenei laasaga tele ua oo i ai le ekalesia i lona fā ai lenei o tausaga talu ona faavaeina.
