“Ole afioga Fuimaono Titimaea Tafua ose tasi o faiaoga na tu maualuga ai le tatou Manu Samoa”…Taitaifono Iuni Lakapi
Ua toe talanoa le Taitaifono ole Iuni Lakapi a Samoa le afioga ile Palemia susuga Tuilaepa L Sailele Malielegaoi ile tu maualuga ole Manu Samoa a’o avea muamua le afioga ile Gafatasi, Fuimaono Titimaea Tafua, ma faiaoga.
Sa avea foi o ia ma faiaoga ole aulakapi taitoafitu ale Manu Samoa. Ile finagalo ole taitaifono ile faatalanoaga masani i Aso Tofi ma le leitio ole 2AP, sa ia faailoa ai na fulisia uma le Komiti Faafoe ale Iuni e filifilia Fuimaono Titimaea.
Ose laulau sa iai nisi sa filifilia e faia le faaiuga ma ave ai le fautuaga ile Komiti Faafoe ale Iuni sa gafa ma le sailia ose faiaogaulu.
Ole latou fautuaga lea na lagolagoina ele Komiti Faafoe e taitaifono ai le afioga ile Palemia.
O Fuimaono e pei ona saunoa le afioga ile Taitaifono, ose tasi o tamalii e malosi lona leo i tama lakapi ole ‘au, ma ole isi lea itu tāua sa silasila iai le Komiti Faafoe. Ua manatu foi le Komiti Faafoe ia lē toe filifilia se papalagi mai fafo ona e iai lava lona eseesega ole tele lava o faiaoga mai fafo sa filifilia e faamautu i fafo.
Ole isi tulaga na ta’ua ele Taitaifono a iai foi se faiaoga papalagi e faaluafesasi le malamalama ai o tama ile gagana. “E le ose faiaoga la e tau faailoa, e pei a ole mea lea ua vaai atu iai i tama, e matuā moomia lava se tagata e mafai ona ia unaia le agaga taalo, e kuai ni foli a’o ni oli ua faaalia ile agaga naunau e taalo.”
“Pei la ole vaavaai atu ale tatou Iuni pei ua sola ese le tulaga lena, ole naunau taalo ma naunau malo, o lea la ua filifilia tonu lava le tagata e manatu le iuni nate mafai ona faatino le tulaga lena”.
Ole taimi na avea ai Fuimaono Titimaea Tafua ma faiaoga ole Manu Samoa sa faatoilalo ai ele aulakapi ale atunuu le ‘au malosi a Ausetalia ole Wallabies.
Ose isi lea o matatia maoae na oo iai le Manu Samoa ile taitaiga ale Gafatasi.
Ole Aso Lulu ua mavae na faamautu ai le faaiuga ale Komiti Faafoe ole Iuni Lakapi a Samoa e toe tuu tasi atu le faiva o Pili ile tulaga faiaogaulu ole Manu Samoa i lea tamalii, ose tamafanau a Samoa ua iloga ona tulaga aao ile lakapi ilo tatou atunuu aemaise ole va ma isi atunuu ole lakapi iuni.
