Ole tasi lea matagaluega e pito sili ona tāua le latou tautua ma le latou auaunaga i totonu i soo se atunuu, ole matagaluega ale falemai, auā ole auaunaga lea oloo fai ma sulufaiga ole atunuu pe a oo ina aafia tagata i gasegase ole tino.
Ole tulaga foi ole latou auaunaga e tatau ona oo iai le 100% o mea faigaluega e faaaogāina, ia 100% foi le tautua ale aufaigaluega poo fomai ma alii ma tamaitai tausi soifua.
I totonu ole tatou atunuu i Samoa ua matuā mimita lota loto ile siitia maualuga ole tulaga manaia ua oo iai le falemai tele i Matootua, ua mamā totonu ole falemai, o potu ua faaaogāina e ma‘i e taooto ai pe a taofia se gasegase, ua faaaogāina foi lifi e feoai ai tagata i totonu ole falemai amaise ai ole lelei ole faatulagaina o paka o taavale ua leai lava se eseesega ma atunuu i fafo.
O nisi ia vaega sa ou maitauina ile suiga lelei ma le matagofie ole tulaga ua iai le falemai tele i Motootua, ua ota mimita ai ma ua faailoa mai ai oloo laalaa pea i luma le atunuu ma lona tamaoaiga.
Faanoanoa ile faatinoga o tiute a nisi o tausi soifua ma fomai
Pau lea ole vaega oloo vaai ai ma le faanoanoa i totonu ole tatou falemai tele lea i Matootua, ole galuega a nisi o fomai oloo faatinoina, i latou oloo taunuu atu iai ma‘i ma latou siakiina. Ile faanoanoaga tele ole loto i lea vaega, ona e tasi le vaiaso na ou alu ai i Samoa ile faalavelave a lo‘u aiga ile masina o Iuni, sa maua ai le avanoa e asiasi ai i uta ile falemai e ave se tasi o o‘u uso e vaai le fomai ile aoauli ole Aso Sa 25 Iuni, ona ua lē sao se meaai, ae na ole faasuati mai (tulou).
Sa siaki lona toto e tasi o tausi ma‘i pasi, ona matou faatalitali lea ile taimi e lau mai ai le numera pe ā ma le 15minute ae vaalau mai loa. Na toso atu i totonu lo‘u uso ina ua valaau mai le numera, ma vaai ese tasi o tina fomai matua pe a ma le 60 tausaga le matua. Na fesilisili le fomai poo le ā le gasegase, sa ou faamatalaina ai le mafuaaga na matou o atu ai ile falemai faatasi ai ma le fesoasoani ale toalua a lo‘u uso e tau faamatala le ma‘i.
Ole lē sao ose meaai faatasi ai ma le faasuati pe a ‘ai, e lei uma atu a‘u tala ile faamatalaina ole mai, ae faasaga mai le fomai lea ma otegia lo‘u uso, fai mai ole lē usitai i meaai oloo aumai ele fomai e tatau ona ‘ai ai, lea e mafua ai ona oso fufula le tuli ma pa‘ū ai le mumu ile vae, ma le tele lava o isi ana tala.
Na oso lo‘u faanoanoa ile fomai ona o lea e tigaina lo‘u uso ae toe tele ai ma ana tala, na ou oso atu ou toe fai ile fomai na matou omai ona e manaomia se tautau ose IV ona e le o sao se meaai, ae faasaga mai foi le fomai ua atili ai le tele mai o ana tala.
Na matou faatalitali laititi ma le onosai i lea taimi pea ma le 10 ile 15minute e talitali ai le iuga o tusitusiga ale fomai lea poo fea a ave iai lo‘u uso.
Ae tei ane ua fai mai nisi o tausi soifua e toalua e avatu lo‘u uso i totonu ose tasi o potu e fai ai ona togafitiga, ma sa faapea ona ou mulimuli ai lava oute fia iloa poo le ā le isi galuega ole a fai iai.
Sa ou vaai ma le faanoanoa i lea taimi i galuega a fomai o lea ua faatinoina ile vae o lo‘u uso, ona ole vae ua amata ona putaputa auā oloo pa‘ū ai le mumu.
O taga pepa sa iai vavae i totonu e faatinoina ai galuega a fomai, sa aveese ele fomai vavae oloo iai totonu ae sae lua le pepa ma avane taga pepa nei ma kava ai lalo ole vae ae se‘i taumafai latou togafitiga, ae o nei tamai taga pepa ua leva ona pefua i luga o fata ae o lea ua toe avane ma toe kava ai le vae ma atili pipii ai le siama (tulou).
Sa ou fesili muamua lava iai ile tamaitai lea, pe iai ni latou ie mamā e avane e kava ai le vae, ae fai mai lana tali e leai tau lava ina tuu i lalo ole vae. I galuega a lenei fomai, na ia niniina ai le vae o lo‘u uso ise vaimanu‘a, ma sa ou toe fesili ai loa i lana galuega oloo fai, poo le ā le aogā ole vaimanu‘a lea ile vae? Ae tali mai le tausi soifua, ole faatonuga na aumai ile fomai lea sa ia vaaia, na ou toe fesili iai ae ole ā sa oe vaai iai i lena vaimanu‘a, ole ā sona aogā ile leaga ole vae? Ae tali mai, o lea e nini ai le vae pe pa pa mai ai putaputa ole vae. Ole taimi lea na ou toe fai ai loa ile tamaitai tausi soifua, e le selau pasene lo‘u ioeina o lau tali ona o lea ete fai mai, tau ina nini pe pa pa mai ai putaputa ole vae.
O lona uiga e le o mautinoa lau tali i lau galuega oloo fai. Ma le isi mea ole vae ua pa‘ū ai le mumu ae o lea ua uma ona nini ile vaimanu‘a ona saisai faasolo atoa lea ole vae ile fusi. Na lagona le faanoanoa i lea afiafi i lo‘u vaai alofa isi o‘u uso ile avatu ile taigaina ae tele ai tala a fomai toe sese galuega na faatinoina ai.
Na toso lo‘u uso ma tautau lana IV ma fai ai ma la‘u talosaga oute manao se‘i taofia lo‘u uso ise po se tasi se‘i fafaga lelei lona tino ile IV ae tali mai le fomai lea sa ia vaaia muamua e le o ia e pule ile falemai ae vaavaai foi pe iai se potu avanoa.
Sa ou toe fai ile fomai e moni a lau susuga ae oute talitonu o au faamaumauga e maua ai se avanoa e taofia ai si o‘u uso. Pe ā ma le tea ole ono ile afiafi lava lea sa toe asia ai ele fomai tina lea lo‘u uso poo ua uma lana IV ma ia vaaia ai oloo saisai faasolo atoa lona vae ile fusi, ma ole taimi lava lea na toe tatala ese ai ele fomai le fusi ile vae ae se‘i tau faasavili le vae ne‘i palagia.
Ma lana faatonuga e taofia lo‘u uso ona o lea e fai si tigaina, ma e oo mai ile taimi nei oloo taofia pea ile falemai i Motootua. Mo tatou ia e aumau i atunuu i fafo e tatau ona tatou mataala pe afai ae gasegase se tasi o lou aiga i Samoa ia aua ne‘i tuua le finau e fai le mea moni auā le saogalemu ole soifua o tatou tagata.
