Ua aloaia nei i totonu ole Faavae o Samoa le teuteuga ua pasia e le Palemene e faamauina ai faaletulafono o Samoa o se atunuu e faavae i talitonuga Kerisiano.
Ose isi faaupuga e faigofie ona malamalama ai o Samoa ole atunuu Kerisiano.
Ole tauaofiaga ale Palemene ile aso 30 o Me 2017 na faitauina ai ile faitauga faatolu le teuteuga ma pasia ai loa lea na faatino le palota tau valaau e faamauina ai faipule e tetee ma faipule e lagolago.
Ole afioga ile Palemia susuga Tuilaepa L Sailele Malielegaoi na ia faatu le lafo mo se palota tau valaau ma ole faaiuga e fulisia le Palemene ile 43 o faipule na palota ioe.
Sa iai atugaluga o nisi ile teuteuga fou lenei ona ole a lē mafai ai ona toe faaofi mai i Samoa se isi tapuaiga pe ole a noatia ai foi tagata ona filifili ise isi tapuaiga e le Kerisiano e tapuai ai.
Peitai ua faaalia e le Loia sili ale Malo le afioga Lemalu Herman Reztlaff i se lipoti a se nusipepa e le o afaina le vaega 11 ole Faavae ile teuteuga ua pasia lea e faasino ile saolotoga o lotu ma le saolotoga e filifili ai le tagata i lana lotu e fia tapuai ai.
Faaalia e le Loia sili ua na‘o le faaupuga lava o Samoa ole atunuu Kerisiano ae e saoloto lava tagata ole atunuu e fai le filifiliga i lana tapuaiga e fia auai.
O lona uiga e leo taofia ai le faaulufale mai ose isi lotu fou ma se tapuaiga fou tusa lava pe o se tapuaiga e le kerisiano.
Ole lotu Isalama ua i Samoa faapea foi le Faatuatuaga Bahai. Oloo galulue foi i Samoa nisi tagata ole latou tapuaiga ole Hindu ae e leo noatia le saolotoga o tagata talitonu o ia tapuaiga e faia ai a latou sauniga i totonu ole atunuu.
Ole uiga lea ole finagalo ole Loia sili ale Malo e le o saisaitia pe taofia ai ia ituaiga o tapuaiga mai le faatinoina i Samoa.
Sa iai le manao ole Fono a Ekalesia Soofaatasi oloo iai i totonu lotu autu poo mainline churches e pei ole EFKS, Metotisi, ma le Katoliko e fai e le Malo se tulafono e faamuta ai ona toe aumai se isi tapuaiga fou ae ua lava ia lotu ua iai nei i Samoa.
Peitai e manino lava le finagalo ole Malo e le mafai ona faia se tulafono ona e afaina ai le saolotoga ma aia tatau o tagata e filifili ai lana lotu e fia tapuai ai.
Oloo faatalia nei le saini ale afioga ile Ao ole Malo, Tui Atua Tupua Tamasese Efi, ile teuteuga ole Faavae ua pasia e le Palemene ona amata faamamalu ai lea ole faaofiina aloaia o upu ole Faatomuaga ole Faavae poo le Preamble i totonu ole Faavae ole atunuu ma avea aloaia ai loa ose vaega ole Tulafono Faavae.
O tausaga ua mavae sa na‘o faaupuga o Samoa e faavae i tu ma aganuu ma talitonuga Faakerisiano sa ile faatomuaga ae e le ose vaega ole Faavae ia faaupuga.