E toafitu Samoa na taaalo ile taaloga ole Bledisloe Cup i Ueligitone ile Aso Toonai, ile va ole All Blacks male Wallabies. Na manumalo le All Blacks i ‘ai 29-9, ma ua toe nofo ai foi le Ipu i Niu Sila mole isi tausaga.
Ole 14 ai lea o tausaga sosoo o manumalo pe Niu Sila ile Ipu.
O alo o Samoa sa taaalo ile Bledisloe Cup e aofia ai, Scott Sio, Allan Alaalatoa ma Will Skelton mole Wallabies, ae o Jerome Kaino, Julian Savea, Ardie Savea ma Charlie Faumuina mole All Blacks.
Ae na maua le avanoa e talanoa ai le Samoa Times (ST) ma Scott Sio (SIO) ile faaiuga ole taaloga.
ST: E ā mai le taaloga?
SIO: Fai lava si faigata ole taaloga. Na matou iloa ole tulaga lea o e oo iai le taaloga. Na faigata ona sosoo le alualu ole matou taalo ma agai ai i luma le finau ale Wallabies. Ole tulaga faaletonu lea ole taaloga mo matou.
ST: Ole tulaga lea ile ‘au atoa lea ete fai mai ai. Ae ā oe, ma lau lava taalo male lua tauvaga ma Owen Franks?
SIO: E lē ole taimi lenei e fai ai se sailiiliga taitoatasi i la‘u lava taalo ile faatoa uma ole taaloga. Atonu ole vaiaso fou ole a iai le taimi e matuā mafaufau lelei ai i la‘u lava taalo. Ole taimi tonu lea e maua ai se aogā o lesona na ou maua mai ile po nei. Ole galuega ale numera tasi (numera a Sio), e taofiofi le sikalamu, ina ia aua ne‘i unaia ma alu i tua. A‘o Owen Franks, ole numera tasi lea a Niu Sila ile pou lusi. E iai taimi na ou tu malosi ai, e iai foi taimi na ia tu malosi ai. Oute fiafia tele ma te pou ma Franks, auā e lelei tele lana taalo. Ole a ma pigi foi i Aukilani i taaloga mulimuli ale Bledisloe ile masina o Oketopa.
ST: Ioe, e iai taimi na faasala ai Franks ona ole malosi ole pa‘ū sikalamu. E iai foi taimi na faasala ai oe ile pa‘ū ole sikalamu. Na e popole a‘o loma le taaloga ona ole mea na oo ia te oe i taaloga ma Egelani (na faasala Sio ile taaloga muamua ma Egelani, e lei filifilia e Michael Cheika mole taaloga lona lua)?
SIO: Leai. Ou te lei popole. E tele lesona na ou maua mai le taaloga lea ma Egelani. E faapena foi le taaloga lenei. E iai isi taaloga e siitia maualuga ai la‘u taalo, ma isi taimi e pa‘ū ai foi le taalo. Ae e tele lesona na ou maua mai ia Egelani, lea na ou tapena e aumai ia lesona ile taamilosaga ole Bledisloe male The Rugby Championship.
ST: Ole ā le luitau mo oe ile taimi nei?
SIO: Ole luitau ole taofiofi lea o lo‘u tulaga ile ‘au. O lea ua maua le avanoa oute taalo ai, ma ole a ou taumafai foi e finau mo lea avanoa ile ‘au amata i taaloga uma.
ST: Na sui oe ile 15minute ole ‘afa lona lua. Aisea?
SIO: Ole tulaga masani lava lea ole taaloga. O suiga masani ale Wallabies ile faaaogāina ole ‘au faaleoleo. E matuā taalo ile 15-20 minute ole ‘afa lona lua ona omai ai lea i tua o isi ae oatu le ‘au faaleoleo. Ana faapea e latalata le sikoa ile taimi lea atonu e umi laitiiti atu sa‘u taalo ae o suiga ia e tusa male iloa a faiaoga.
ST: Ole ā sou iloa ile taalo ale Wallabies ile po nei? Faamata sa lelei pe leai?
SIO: Ioe, lelei tele le matou taalo. E sili atu le sikoa ole vaiaso nei. Na faalogoina foi ile taimi ole taaloga le taaalo faatasi lelei ole ‘au. Leai se faaletonu.
ST: Allan Alaalatoa, e ā mai lana taalo?
SIO: Manaia tele le taalo a Allan. O so‘u mitamitaga foi lea ole iai ole uso ile ‘au. Oute masani lelei i lona aiga, manaia tele foi le vaaia ole uso ile ‘au.
ST: Faafetai lava Scott mole talanoaga, ia manuia taaloga oloo totoe ole taamilosaga.
SIO: Faafetai lava.
Scott Sio
Tulaga: Pou
Aso Fanau: 16 Oketopa 1991
Maualuga: 187cm
Mamafa: 115 kilokalama
Taaloga faavaomalo: 17
Tausaga muamua: 2013
Au Supa Rugby: Brumbies
Aofai o taaloga Supa Rugby: 65
