Ua salalau nei ma amata lagolago e nisi o talavou ma fanau aoga le savali ua galulue i ai le ofisa o leoleo i Cabramatta ma taitai o le Pasefika ua faaigoaina o le FistsDown poo le “Tuu i Lalo au Moto” ma alo ese i le faaoolima ma faamisa i totonu o aoga, nofoaga faitele ma taaloga e pei ona vaaia le faateteleina.
O le nofoaga autu o le Ofisa o Leoleo i Cabramatta na talo ai se fono a talavou ma taitai o le Pasefika e le Susuga Satini suesue sinia ia Darren Newman ma leoleo e faasoa manatu ai i se auala e ofi gofie ai i talavou faatupu vevesi le inosia ma le faaluma mātua ma atunuu o uiga faapenei lea e vaaia ai le osofai o se tama poo se teineitiiti se toatasi e le toafia sefulu o tamaiti talavou.
Na faasoa manatu taitai o le Pasefika e aofia ai le Fono Aoao a tagata Samoa ma malilie ai e faasolo ni asiasiga i aoga maualuluga o loo toatele aofai o fanau Pasefika o aotauina ai ma momoli atu lenei poloai e faamuamua le ava ma pulea loto, tauave ma mitamita i o latou tupuaga e ala i mea lelei ma faamuamua le aoga mo manuia ae aua le seetia i faiga faaonaponei, kegi ma amio lē pulea.
O lenei Fono na taitai e le tamaitai Maori ia Mal Fruean le Taitaifono a le Pasefika i Niu Sa Uelese.
Sa faailoa ai foi e le Matagaluega a leoleo afai e faaauau pea nei faiga matautia e lē o toe mamao ae vaaia le toto masaa i fanau Pasefika ma aafia ai loa aiga ma ē masani i fetauaiga nei. O se manatu na saunoa i ai nisi sui o le Pasefika o le leai o ni taimi o mātua e mafuta ai ma faatonu fanau talu ai galuega, taaloga, faleavamalosi ma kalapu aemaise ai masini poka ma taaloga faitupe.
Faailoa e le leoleo ia Darren Newman o le vaaia o naifi ma pate pesipolo ma kirikiti ua atili matautia ai lenei faafitauli ma o le mataalia o leoleo na o latou faasalaveia ai le isi misa tele na amata mai luga o le facebook mai tupulaga na omai Liverpool ma Granville e faia le misa i Cabramatta.
O se tasi o vaaiga leaga tele o se teineitiiti aoga e sefulutolu tausaga ia Destiny Faleono e na o le sefulutolu tausaga na fasitele e teine aoga i totonu o le nofoaga faatali nofoaafi i Blacktown a o alu atu e koleni talu ai le tetee atu i se tamaitiiti e sefulufā tausaga na fesili atu e fai se la uo ae teena e Destiny Faleono leaga o loo agai atu mo ana toleniga.
Sa toatamai lenei tamaitiiti e lē masani ai Destiny Faleono ma ia tago loa faaoso nisi o teine aoga Samoa e faaoolima ma fasi leaga Destiny a o pisi le mamamlu o le au femalagaa‘i lea na afaina ma gau ai lona isu toe afaina ai ma lona ulu (concussion).
