E lē toe tau faailoa i le atunuu e malaga atu i Samoa vaaiga ua iai nei le taulaga o Apia ma nofoaga tu lalata i le laumua o le atunuu i le vaaia o fanauiti i le po ma itula o le aso o loo faia galuega masani.
Ua tai se mata i nisi e faigaluega i le Malo ma kamupani ma pisinisi i le taulaga le molimauina pea o ia vaaiga.
O tamaiti ua feoai ai ma atigi pusa ua fafao i ai oloa eseese, e pei o afitusi, oti atigilima, o vili taliga, maa moliuila, pulu ta‘ele, tafi sele‘ava ma le anoano o iai oloa laiti.
O aso ua mavae sa pei lava o oloa e pei o ila mai fugalaau manogi e pei o le mosooi, ma oloa e pei o faguu Samoa ma fualaau‘aina sa masani ona faatau e fanau, a o aso nei o oloa e maua i faleoloa ua latou faatau.
O le faiga a nisi aiga ua faatau atoatoa mai oloa mai faleoloa siiatoa, ona avatu lea talai ma faatau taitasi le isi lea o mafuaaga o le vaaia o fanauiti ma ia oloa.
I taimi muamua na laga ai ni finagalo i nei vaaiga sa tali le Palemia ma ia faaalia o lea ua amata faataitai fanau i le faia o pisinisi. Pe atonu e sa‘o ae peitai e lē tatau ona tutuli ni fanau mai le 10 e oo i le 15 poo le 16 tausaga e faatau nei oloa auā o taimi lava ia o le aso e tatau ona o i le aoga.
O itula foi o le po o loo vaaia ai o le taimi lea ua tatau ona iai io latou aiga e fai ni meaaoga ma momoe e sauni mo le aoga o le aso fou.
Ona o le faafitauli lenei ua aapa mai ai le Faalapotopotoga o Leipa Faavaomalo le International Labour Organisation (ILO) ma faia se suesuega i Samoa lea ua iloa ai, ua faatupulaia fanauiti ua aafia ai. O le molimau a le sui o le ILO i Samoa le susuga Tomasi Peni, ua lē gata ina maua i le suesuega ua siitia fanauiti ua faatau oloa i le taulaga ae ua iai ma isi solitulafono ua aafia ai e pei o feusuaiga faapisinisi poo commercial sex.
O nisi o matagaluega a le Malo e pei o leoleo, ma le Matagaluega o Tina ma Tamaitai faapea le Matagaluega o Aoga Taaloga ma Aganuu, ua latou galulue faatasi nei ma le ILO ma isi faalapotopotoga tumaoti e tau faataoto se alafua e lima taitaiina ai se fuafuaga e fofo ai lenei faafitauli.
Faaalia e Tomasi Peni o se tulafono e faatonutonu ai o loo silasila i ai nei matagaluega a le Malo ina ia mafai ona taofiofi ai le faaaogāina o fanauiti e o latou mātua ma aiga e o e faatau oloa e sue mai ai ni tupe.
O lea o loo faatali nei i se finagalo o se komiti galue sa filifilia pe ua tatau ona faalauiloa le taunuuga o le suesuega na faia i le tausaga ua mavae e oo mai i le tausaga nei e faatatau i fanau o loo faaaogāina e faatau atu oloa poo street vendors.
O le faaaliga mai le susuga Tomasi e ui ina iai popolega i Samoa i lenei mataupu peitai o atunuu pito ogaoga aafiaga o fanauiti i nei tulaga, o Fiti, Kilipati ma Papua Niu Kini.
