O le umia o le talita mai le tausaga talu ai i le amataga o le taamilosaga o le tausaga nei , ina ua afa tonu ai foi ma le taamilosaga i le taimi nei a Aukilani Samoa, o se matatia e iloa ai le malosi toe atoatoa ma le agavaa ma le lava tapena o se Au i le taamilosaga.
E lē natia ai le lelei saunia ai foi o se Au o loo maua le avanoa e luiina ai le talita i le taimi ua talafeagai ai, ma o se avanoa e lē au uma i ai ‘Au o se taamilosaga pa afai e femoumouai le talita mai lea vaiaso i lea vaiaso, ma o le tāua foi la o le faaeva solo o le talita i se taamilosaga e ono maua ai avanoa faalua pe faatolu foi o nisi o ‘Au e toe taumafai ai i le talita.
O se taaloga matagofie tele i le faaiuga o le vaiaso, le puipui a Nations i le talita, ae o le taumafai mai foi o le Auckland Reds i avanoa. Sa mataina le taaloga i le matamata, faapea foi tapuaiga a Au uma e lua i le pulea lelei, faatasi ai ma le tapuaiga a le atunuu sa molimauina le maimoaina o lenei taaloga.
Na matuai faafiafiaina kalapu uma e lua i le mataina o le taaloga. Tusa ai ma faamatalaga mai le Iuni faapea o lea ua laasia le ogatotonu o le taamilosaga.
E lē o mautinoa foi e le tusitala pe faaauau pea le talita i isi taamilosaga o loo mulimuli mai atonu e maua se faamaninoga o lenei mataupu i le vaiaso fou i tala i taaloga.
Manatua foi e lua pools o loo faagasoloina ai taaloga o lenei tausaga o le Pool A ma le Pool B, tusa ai la ma taaloga i le vaiaso ua mavae, na malolo ia Laumua o Tumua faapea ia Saleimoa Bye leai ni a latou taaloga ae i isi taaloga sa faagasolo i le Pool A na matuai sola Laulii ma le manumalo i le la taaloga ma Iva, manumalo Tama o le Lava i le la taaloga ma Moataa, ae se‘i e Auckland Reds le talita mai ia Nations.
Ae i le faagasologa o taaloga i le Pool B, na manumalo Malisi ia Sataoa, manumalo Apia Maroons ia Nofoalii, ae sola Tauaana Roosters ma le manumalo ia Mountfort i le la taaloga.
Ae i se vaavaai atu i taaloga o le faaiuga o le vaiaso nei, i le Pool A manaia le taaloga lea o lea taaalo ai Laulii ma Moataa, Tama o le Lava ma Nations, ae taaalo Laumua o Tumua ma Iva ma Salafai. Taaloga o le Pool B, o le taaloga i le va o Malisi ma Tauaana Roosters, Saleimoa ma Nofoalii ae taaalo Apia Maroons ma Mountfort, ae Bye Sataoa.
Manatua o nei taaloga o loo faagasoloina pea i le Aorere Park Reserve i Magele i Sasae, e amataina taaloga i le 12 i le aoauli o Aso Toonai taitasi. I se feiloaiga i le vaiaso na se‘i mavae atu na faailoaina mai ai e Aiolupotea John Roache, o le faaiuga la o le vaiaso nei e faamanatuina ai e le Kalapu lakapi a Otahuhu nisi o tausaga talu ona faavaeina, ma o loo faaauauina ai pea i le taimi nei.
