O se alii mai i le pitonuu o Leone i Apia ae e nofo i se tamaitai Vaimoso, na fiu taumafaiga e tau faaola i le afiafi o le Aso Toonai ina ua avane i luga lona tino maliu i tua o le maketi o i‘a i Savalalo, na maliu lava i lea afiafi. O le mafuaaga o le maliu o loo taatia atu i Leoleo ae e tele faamatalaga ua faapea ona faia faasaga i lenei faalavelave.
O le latalata i le 3pm i le 4pm ae logo mai loa le tatou ofisa o loo ua faia se sailiga a le Ofisa o Leoleo i tua ane o le maketi o i‘a i le nofoaga o loo taula ai vaa fagota i Savalalo. Na agai atu ma maua ai ma aumai loa i luga o le tino maliu o le alii e pei ona ta‘ua.
O le faamatalaga ua malemo ae na sulu i le sami faatasi ma se isi alii ona o loo tuliloa mai e se potopotoga o nisi o alii ma na agai mai i tala atu o le Maketi o i‘a le tuliga ma feosofi ai le toalua lea i le sami.
Faaalia e nisi na molimauina tuliga nei alii, e tiga lava ona agai i le sami alii e toalua e aofia ai ma le alii ua maliu ae na tauai atu lava e le potopotoga o alii na o latou tuliloa maia i laua.
O lea na ta‘ua ai e ea ane loa i luga lē ua maliu ae tau ai ma le maa i le ulu ma toe magoto ifo ai lava i lalo. Na agai mai leoleo ma taumafai e saili ae na toe puna lava i lalo se uncle o lenei alii ma mafai ai ona aumai i luga le tino o lenei alii ae na fiu taumafaiga e toe tau faaola ua foliga mai ua maliu lava ma ave ai loa e le taavale a leoleo le tino o lenei alii talavou mo le falemaliu i Motootua.
O le mau a i latou na vaaia lenei faalavelave, e foliga mai lava e telē se manu‘a o le ulu o lē ua maliu, ma o le isi alii na o la toalua na sao mai ae na iai foi manu‘a o lona ulu i le taimi na toe ea ane ai i luga.
O nisi na tuuaia i le tau‘aiga maa na ta‘ua e molimau na ave e leoleo ina ua faatoa taunuu atu leoleo i le nofoaga na tulai mai ai lea faalavelave.
E matautia vaaiga ina ua aumai i luga sia alii ona o le toatele o le atunuu sa i lea nofoaga, ae ana lē alu ane lava lona uncle lea na toe maulu i lalo ma maua mai ai le tino o lenei taulealea, ae e toatele lava sa na o le tutu ma vaavaai i le faalavelave na tulai mai ae ua leai lava se isi e agai ane mo se fesoasoani.
Ona pau le faamatalaga na maua, o i latou na aafia i lenei faalavelave e foliga mai sa faasuaava uma lava.
O lea na taumafai atu i le ofisa o leoleo i le amataga o lenei vaiaso mo se faamatalaga ae faapea mai, seia mae‘a fonotaga ma lipoti e tuuina atu ona aumai lea o se faamatalaga auiliili o lenei mataupu ae o ai foi nisi ua molia i le maliu o lenei alii talavou.
