O le faaiuga o le vaiaso na tea nei na molimauina ai se sauniga e talia aloaia ai le faafeagaiga fou o le afioaga o Loimata o Apaula i le Ekalesia Faapotopotoga Kerisiano Samoa.
O le tausaga na tea nei na malolo penisione ai le faafeagaiga na tausia lea ekalesia. O Loimata o Apaula lea e i le va o Avele ma Vailima ma o se aulotu e lē toatele ona sui ae ua mautu ana atinae mo le mamalu o le atunuu o loo nonofo ai i lea vaega o le Vaimauga.
O le susuga Rev. Tepatasi Tafili ma lona faletua ia Tovaleia ua filifilia e le Ekalesia lenei i Papauta, e avea ma o latou faafeagaiga. O le sauniga e faamaonia ai lenei suiga i le ekalesia a Loimata o Apaula na taitaia e le Susuga i le Faafeagaiga o le EFKS i Tanugamanono o Rev. Eteuati Reupena, lea na ia saunoa i le tāua o le onosai i galuega faapenei.
“O le valaauina o se faifeau e se aulotu, o se laasaga tulagaese lea i lagona o le aufaigaluega filifilia, e tulagaese ona ua filifili mai e le aulotu le faifeau ae lē o filifili e le faaifeau le aulotu e fia galue ai.
E na o le ioe lava o le faifeau ma alu loa e galue, ae o le vaaiga lea faaletagata, i le filifiliga o le aufaigaluega galulue, e pei o le filifiliga e mafuli i le Ekalesia, ae o loo lilo i tua o nei mea uma le galuega o le agaga o le Atua, o loo fai i loto ma lagona o le aulotu, e faaali atu i ai le faifeau e filifili i ai, e faaali foi lagona o le aulotu, ae ua leva foi ona galue le agaga o le Atua, e tapena le faifeau e tatau ona fai ma o latou tofi,” o le saunoaga lea a le taitai o lea sauniga.
A o faatali se filifiliga a le Ekalesia na faapea ona tausia le ekalesia e a‘oa‘o fesoasoani o le aulotu e aofia ai le susuga Lilomaiava Fou Taioalo ma na ia lagolagoina ai upu faamalosi o le aso, e lē faigofie nei ituaiga tofiga e pei foi ona oo i ai ina ua tālia so latou feagaiga. O lea la ua faamautu lenei laasaga ma o le faafetai a le alii a‘oa‘o fesoasoani o le tino mai o le faaiuga a le aulotu auā e lei tasi faiga palota ma na umi foi se taimi o faia seia oo lava ina ua finagalo autasi le afioaga i le faafeagaiga fou ua iai nei. O le Ekalesia Faapotopotoga Kerisiano i Loimata o Apaula e 10 matafale lotu o loo tautuaina i le taimi nei.
