Mamalu o le Atua (In His Presence) o le manulauti lea sa autu i ai manatu ma le faamalosi o le koneferenisi o lenei tausaga 2015 i le Assembly of God i Niu Sila. O se mafutaga mafanafana ma le faamalosiau i Ekalesia e 55 sa auai, mai lava i Ekalesia e 10 i Kalaiesetete, 10 i le Central, 12 i Ueligitone ma le 23 i Aukilani.
O le vaitaimi o le Eseta i tausaga taitasi ua uma ona faataoto e le komiti faafoe e usuia ai ana fonotaga auā o se avanoa lelei ua malolo uma ai tagata mai galuega aemaise o le tuua ai o aoga a le fanau.
O le faaiuga o le vaiaso na toe gasolo ai le fonotaga a lea Ekalesia mo lenei tausaga. O le ASB Stadium i Kohimarama na faatautaia ai lea faamoemoe ma sa tumutumu ai Ekalesia eseese a lenei matagaluega i Niu Sila nei. O susuga i faafeagaiga ma o latou faletua, o le au usufono ma nisi sa agai atu e fia faalogologo i le upu a le Atua.
O le afiafi o le Aso Faraile i le itula e 2 na tatala aloaia ai le fonotaga i le resitalaina o suafa o tagata o ekalesia taitasi. Ae o le 7pm na amata ai loa le sauniga, lea sa tatala ai i le saunoaga faafeiloai a le susuga i le taitai ia Ailaulau Faletutulu ma lona faletua ia Nancy Faletutulu, e faataulima ai i le mamalu o ekalesia uma sa auai.
O le taitai aoao o le Assembly of God i Niu Sila le susuga ia Iliafi Esera na ia mānavaina le upu a le Atua i le amataina o lenei mafutaga.
O se sauniga mamalu ma le galue o le Agaga Paia o le Atua i lea afiafi i loto ma agaga o lana fanau i le taimi na tuuina mai ai le avanoa i tagata e fia manaomia le tatalo i manaoga, aemaise o i latou e lei talia le faaolataga a Iesu Keriso.
O le taeao o le Aso Toonai na toe faaauauina ai le vaega lona lua i le talanoa a le susuga i le faafeagaiga i le Presence o le Atua, ma sa toe maitauina ai se vaaiga uigaese i tagata sa iai i totonu o le fale i le galue o le Agaga Paia, o nisi ua tautala i gagana eseese a o nisi ua mafai ona malolo o latou ma‘i.
Na sosoo ma le iputi o le taeao ma faagasolo ai loa faigapalota mo le sailia o nisi sui fou o le komiti faafoe, a o tupulaga talavou sa maua lo latou avanoa i le susuga ia Pastor Luka Robertson e faasoa ai i le olaga o le tama ma le teine talavou, a o fanau laiti sa tapenaina taaloga i fafo i le malae mo latou.
Na fai le malologa ina ua mae‘a le faiga filifiliga ma toe faaauauina ai le mafutaga i le afiafi i le polokalame a le autalavou lea sa toe avea ai Pastor Luka ma failauga o le po.
O le Aso Sa o le aso mulimuli, na faamae‘a ai loa le vaega tolu o le talanoa a le taitai i le mamalu o le Atua i le taeao, o se sauniga na vaaia ai le galala o tagata i le lolofi atu e fia maua le sosooina o le faamalosi i le upu a le Atua, ma o iina sa tele ai tagata na maua le meaalofa o le tautala i gagana eseese ina ua tuu mai le avanoa i se tasi e iai sona manaoga ae tatalo i ai le faafeagaiga, ua oo lava i fanauiti sa lē tuua le avanoa i le naunau e fia maua lea manuia.
Ae lē gata i lea o i latou sa talia le faaolataga a Iesu. Na sosoo ai ma le taumafataga o le aoauli lea sa matuā pa‘ū ai le aao malosi o le susuga i le faafeagaiga ia Matafala Lesa ma lona faletua ia Tine ma le Ekalesia malosi i Matagofie i le tapenaina. E lei iai se fia toatele o le lafu mamoe i totonu o le pa mamoe i le fau ma soloi o manuia o lea aso, ua lē gata i le itu i le agaga ae o le itu foi i le tino. Na tapunia le mafutaga i le afiafi i le sauniga mulimuli na avea ai le susuga ia Pastor Luka ma failauga i le upu a le Atua, ma sosoo ai loa ma upu mulimuli e taumavae ai le fanau a le Atua.
O le susuga i le faafeagaiga ia Matafala Lesa sa fai ma sui o le komiti faafoe e molimolia le faafetai i failauga faapitoa o lenei koneferenisi le susuga ia Iliafi Esera ma lona faletua ia Falefia Esera faatasi ai ma le faafeagaiga ia Luka Robertson ma lona faletua aemaise o susuga i faafeagaiga uma ma sui usufono o Ekalesia e fia sa auai.
Sa tapenaina foi ni teu fugalaau ma ni teutusi e fai meaalofa ai mo le Eseta o lenei tausaga faatasi ai ma le faalavalava a le Ekalesia i Matagaofie. O le faatinoina ma le faapolokalameina o lenei faamoemoe atoa sa nafa lea ma le afioga ia Namulauulu Rose Fatialofa, faatasi ai ma le fesoasoani a sui o Ekalesia taitasi i Aukilani lea e 250 i latou sa galulue. E 6 vaega sa vaevaeina i ai e le faletua le augalulue ma tofia ai foi ma taitai latou te vaaia vaega taitasi. O le tele o i latou sa faaaogāina o tupulaga talavou o tama ma teine faatasi ai ma nisi o tamā sa auai.
O se suiga fou lea i lenei tausaga ona o le faaaogāina o fanau i totonu o le galuega a le Atua e aunoa ma se totogi. O se tofa mamao ma le silasila toto‘a a le komiti faafoe, ua tatau ona tulai mai tupulaga talavou e tauavea vaega uma o le fono e pei ona iai lenei tausaga.
O le mae‘a ai o le fono ua atagia mai ai se suiga tele i fanauiti i lo latou naunau e toe fia galulue i le isi mafutaga i le tausaga fou, ma o le tāua foi lea o le pitolaau a le taitai ia Namulauulu Rose i lona faatonutonu o ala o fanau e savavali ai.
Ua taoto ai nei ma le polokalame i le tausaga fou o le a toe fai ai lenei koneferenisi i Aukilani ma faamanatu ai ma le 10 tausaga talu ona usuia ana fonotaga.
