Ua savali i le fitu tausaga talu ona faatuina i Samoa se tasi o Kolisi o Matata eseese faapitoa a le Malo o Ausetalia ae ua onoselau i latou ua faauu ma maua ai tusipasi ma faailoga i matata sa aoaoina ai. O lea fuainumera toatele e fulisia lava i fanau a Samoa. O se fiafiaga lea o mātua auā e maualuga tele le aloaia o faailoga mai lea kolisi o matata faapitoa ona e talia ma amanaia e soo se atunuu o le lalolagi.
A oo ina malaga i fafo i isi atunuu e faigofie ona maua le galuega i le tusipasi ma le faailoga ua maua i se matata e pei o le fai eletise, kamuta fau meaafale, kuka, galue i le atinae o tagata tafafao e pei o galuega i faletalimalo ma faleaiga, aemaise o isi tomai e pei o le saunia o teugafulaau matagofie mo sauniga eseese poo le teuina faamatagofie o se maota e faia ai se sauniga e pei o maliu, faaipoipoga ma isi lava sauniga e pei o le faamanatu o se aso soifua. O le masina nei o le a mae‘a na faia ai le faauuga a le Kolisi lea e to‘a fitusefulufitu le aufaauu e mafuli lava i alii ma tamaitai o Samoa ma e aofia ai i latou o loo faigaluega ma tautua i nisi o auaunaga.
O le saunoaga a le tamaitai Haikomesina o Ausetalia i Samoa o Sue Langford na ia faaalia ai, o le aoaoina o se tagata soifua i se tulaga maualuga o lona faaeaina lea i le lumanai. O se feau tāua lea mo le aofia na auai aemaise o mātua ma aiga faapea uo ma ē masani auā o le faamuamua foi lea a le malo Ausetalia i fanau a le Pasefika e pei ona mafua ai ona lautogia Samoa e avea ma se tasi o atunuu o le Pasefika e faatū ai se tasi o ana kolisi maualuga mo le aoaoina o matata eseese faapitoa. E lima isi kolisi o loo faatutū i isi atunuu o le Pasefika ma o le autu lava ia maualuga le aoaoina o tagata Pasefika i tomai faapitoa e faigofie ai ona talia ma maua galuega i isi atunuu e faimalaga ma faamautu ai i le lumanai. O le saunoaga a le aufaauu na lagona ai le leo o le faafetai ona o le fesili, poo ai na iluilu talutalu e manatu mai lea Malo e aumai se isi o ana kolisi faapea e faatū i le atunuu ma aoaoina ai fanau a Samoa ia popoto ma iloa soo se matata i se tulaga maualuga o le tomai e maua mai ai.
O se suesuega na faia i le tausaga e 2013 na iloa ai o le 90 pasene o fanau ua iu mai le APTC le kolisi lea o matata faapitoa i Samoa, o fanau a le atunuu ma ua mau galuega lelei i tomai ua latou umia. E faatupe e Ausetalia le faagaioia o lea kolisi e oo foi i le aumaia o i latou e faatino le aoaoina o tomai eseese. E 23 poloklame tau aoaoga eseese i matata faapitoa o loo aoaoina ai. O le tomai ua sili ona molimauina ua fiafia nisi e aoaoina i le APTC o le avea ma kuka poo se tasi e saunia mea taumafa. Ua toatele nisi ua iu mai ai ma ua galulue i faletalimalo i le atunuu, a o nisi foi ua maua galuega i luga o vaa tetele o le sami e pei o vaa la‘uoloa.
