O le tina e faatuatua ia Ieova e faamamaluina o ia, e maua lona filemu i le aoao atu i lana fanau o ala ma tulafono o le Atua, e tupu ai foi le fiafia i lona loto, ma olioli ai i le lumanai. Na aofia potopoto i le malu o taumafataga i Craigieburn ona tauaiga, uo ma lana ekalesia pele e patipatia ma faafoi faatasi le viiga i le Tapaau sili, mo tausaga e 50 ua foai mo lona soifua.
Na taitaia e le susuga i le faafeagaiga taulagi ia Ps Siomia Poto le sauniga na galulue faatasi ai ma Ps Isaako Sila ma Ps Pesamino Mailei. Saunoa le tamā o le aiga faatasi ma o la alo e molimauina le soifua o le tina ia Matalena.
Mae‘a ona lufilufi lea o le keke ma alo ai loa i le taumafataga tele ma le felanulanuai na tali ai le sua. O le tamā o le aiga le susuga ia Filipo na fai ma fofoga o le afiafi, mālie le musika na mafana ai le faatasiga, na faaiu i faaaloaloga mo le aufaigaluega paia ma taape ai ma le fiafia. Foai e le Atua nisi tausaga se tele mo lou soifua, alofaaga mai faafeagaiga ma o latou faletua, uo ma tauaiga uma i Melepone, aemaise si au tautoga ia Filipo, ma nai ou alo ma a latou fanau. Happy Birthday Mum, we love you.
