O le tuanai o le palota tele a Samoa ia Mati o le 2011 ae talali ma mu i le afi se vaega tele o le faleaoga tulagalua o Palauli. Fai mai le faipule o le itumalo, le afioga Afoa John Moors na faia sailiiliga a leoleo ma le fuimu ae oo mai lava i le taimi nei e lē o iloa le mafuaaga.
O tala salalau solo na latou tuua‘ia ai le faaiuga o le palota a le itumalo i lena lava tausaga i le pogai o le malaia na aafia ai le faleaoga. Pe afai la o lea ua lē maua lava le mafuaaga na mu ai le faleaoga, o le a tuu loa i le Atua e ati lana silafaga i le tagata na faia le faalavelave.
Faaalia e Afoa sa saili fesoasoani i le Malo o Saina pe maua ai se laveai tau tupe e toe fau ai se faleaoga fou, ae na lē mafai ona matuu atu se lima alofa o lea Malo ona o nisi o fuafuaga o ana fesoasoani.
O le mafuaaga lea na toe savalia ai loa le Malo o Iapani na fausia i se isi ana fesoasoani le faleaoga na mu. E ui i le matamumuli o le komiti o sui o le itumalo e toe ave se talosaga i lea Malo ae na manumalo le silasila o le komiti i alo ma fanau o Palauli ua leva tausaga o faaletonu le nofoaga e tatau ona aoaoina ai.
Na ave le talosaga ae faailoa ane e le Malo o Iapani e tatau ona avatu e le itumalo e ala i le komiti, ni aiaiga o le a latou faatino, e malu puipuia ai le faleaoga fou o le a toe faatupe e lea atunuu.
Faaalia e le faipule e lei faatuai le komiti i le tuuina atu loa o aiaiga e pei o le leoleo o le faleaoga ma faia le galuega o le fautuaina o aiga o nonofo latalata i le faleaoga ia tau mamao ese a latou sauniuniga e manaomia ai le malaia e pei o le gaseseina o taumafa ina ia lē toe tupu le faalavelave na faatama‘ia ai le faleaoga sa iai muamua.
O le mae‘a tuuina atu o lea aiaiga na vave augofie ai loa Iapani e faailoa lona toe sauni e faatupe le galuega. E $138 afe ma ona tupu tupe Amerika le fesoasoani ma o le a faasoa atu e le ofisa o Iapani i Samoa le faaaluina o le seleni.
E pei ona silafia o galuega faapenei e manaomia foi le faia lelei o lipoti ma faailoa i le vaega o loo maua ai se fesoasoani tupe le faaaogāina o seleni, ma o le tasi lea aiaiga tāua o le foai.
E 8 potuaoga o le a aofia i le galuega atoa faaopoopo i ai ma nisi o vaega tāua o le a manaomia mo le aoaoina o fanau e pei o se potu tusi ma le ofisa mo galuega a le Pule ma faiaoga.
Faaalia e Afoa John Moors o lea ua tini lau o lana galuega i le paeaiga e lima tausaga o le a mae‘a o le nofoaiga a le Palemene o loo iai nei, o le faleaoga tulagalua fou mo lona itumalo o Palauli i Sasae.
