$45,000 tupe na ia gaoia, nofo vaavaaia 12 masina

O le tamaitai o Rosarina Fogatia, sa galue i le faletupe o le National Bank o Samoa ma ia gaoia ai se tinoitupe na faaalia e lana loia e tusa ma le $45,000 tala. E lei auiliiliina i le taimi na lau ai le faaiuga a le faamasinoga, pe sa faapefea ona tupu le solitulafono, peitai o le faaiuga a le afioga i le faamasino o Vui Clarence Nelson, ua le tuuina atu ai se faasalaga faafalepuipui ae ua ave le 12 masina e nofo vaavaaia ai lea tamaitai.
O le mafuaaga o le suia o le faaiuga mai moliaga uma o le gaoi a o avea ma tagata faigaluega (theft as a servant) ua faamaonia ma faia i ai faaiuga, ona sa tuuina atu se talosaga malosi mai le faletupe sa galue ai le ua molia, ina aua nei faia se faasalaga faafalepuipui. Na mafua lea talosaga malosi a le sui o le faletupe na oo atu i le aso na faia ai folasaga faaiu a loia, ona e faapea ua maea ona faia se latou feiloaiga ma Rosarina ma ua malie ai na te toe togitogi le tinoitupe na tagolima i ai, lea e faapea na ia amata togitogi i se taimi o le tausaga ua mavae. O le autu o le finau a le faletupe o le National Bank o Samoa, ona a faia se faasalaga faafalepuipui o le a motusia loa le toe totogiina o le seleni ona le toe maua lea e le faletupe o lana $45,000 na gaoia.
I le faaiuga a le faamasinoga ua poloa’ina ai Rosarina e faaauau pea ona tuuina atu seleni ua malilie i ai ma le faletupe mo le toe totogiina o le tupe ua aafia i lana gaioiga. O le 12 masina ua tuu e nofo vaavaaia ai o le a lipoti ai i vaiaso uma i le ofisa faanofo vaavaaia mo le mautinoa o loo sologa lelei le alu o vaegatupe o loo toe togitogi ai le seleni. Afai e le sologa lelei lea tulaga i totonu o le 12 masina e maea i le masina o Mati 2010, o le a toe tuuina atu loa le mataupu i le faamasinoga mo le faia i ai o se isi faaiuga ma se faasalaga e sili atu. O lona uiga e leai se isi avanoa ae o le faafalepuipui loa o le ua molia.
Faaalia e le afioga Vui Clarence Nelson, ua see ese le faamasinoga ma ana faiga masani i faasalaga o i latou e molia ma faamaonia i le solitulafono o le gaoi a o avea ma tagata faigaluega, ona ua silasila i le talosaga a le faletupe aua o le itu mautinoa a tuuina atu loa Rosarina i le falepuipui, o le a le taunuu ona faaauau le latou maliega mo le toe faaolaina o le seleni, lea e 15 tausaga o le a toe togitogi ai seia oo ina maea. Ua fautuaina e le faamasinoga le tamaitai ua molia, ina ia taumafai i nisi auala e maua ai se isi seleni e totogi atoa ai le tupe, ina ia oo atu i le taimi ua maea ai le 12 masina o lana nofo vaavaaia ua tau iai se faamama avega poo ua maea foi.
Faaalia e le loia sa tu mo Rosarina, le afioga Leota Raymond Schuster, o le $45,000 na aafia i le soligatulafono ua faaopoopo ai e le faletupe i luga ma se seleni tuua poo arreas a Rosarina o ni ana nonogatupe sa faia i le National Bank, lea ua oo ai le aofaiga o le tupe e na te toe faaola pe toe totogi i le $60,000 afe ma ona tupu. O se tasi o aiaiga o le faaiuga a le faamasinoga o le faaauau lea ona taofia pea i le ofisa o faamasinoga le tusifolau o le ua molia, ma o le a ave foi le tusi taofi (stop notice) i le vaega o femalagaiga i le Matagaluega a le Palemia ma le Kapeneta e faasa ai ona tuuina atu se tusifolau mo le ua molia pe a tei ua ave sana talosaga mo se isi tusifolau.