Poo se tiute o le faifeau le faifai, ma lagalaga i le lotoifale faaletagata o se tagata lotu e afua ai le maasiasi ma le aafia o lagona?
O se faanoanoaga tele i se tasi o tiakono ma lona faletua i se tasi o ekalesia i le itu i Saute o Aukilani, ona o le umi ma le leva ona faafesagai ma lo la taitai, le auauna a le Atua o loo tausia le galuega, ae foliga e agai ina mavae le fiafia ma le manumanu o le Leoleo Mamoe i lana mamoe.
O saunoaga taufaifai ma le faaluma aiga, o se tasi o manu’a e matuā tuga tele, ma e faigata tele foi ona togafitia. E leai sona eseesega ma le upu masani a le atunuu e faapea, E pala le maa ae lē pala le tala. Ae o se fesili foi ua tulai, Pe se pisinisi a le Faifeau le saunoa ma ave faaupuga ma faamatalaga faifai e tuuina ai i lalo le agaga taumafai mo le Alii ma lona malo? E tatau i se auauna ona fai ni ona fili i totonu o le finagalo o le Atua?
O le saunoa o le Faifeau ma fesiligia le tupuaga o se aiga, sa avea ma mafuaaga o le aafia ai o le lotoifale o le faletua o se tasi o lana aufaigaluega tiakono, na mafua ai ona a’e se finagalo ma manatu lea matafale o le ekalesia, ua tagofia e le Faifeau le pisinisi tau i le aiga lava latou ia, sa lē tatau ona āiaina fua ma suesuevale i ai.
O se tasi o tulaga na matuā mafatia ai lea aiga ona na saunoa le Faifeau faalauaitele i luma o se faalapotopotoga tuufaatasi a le aulotu, ma ua aliali ai le ta’ufaatauvaaina,o lea aiga. E lē gata i lea ae foliga o se solitulafono foi lea tulaga ona o le āiaina o le siosiomaga faaletagata lava ia (privacy), ma o se sauaga matatutia i lagona ma le loto, (emotional abuse) o se tasi o vaega e matuā tāua tele i le vaai faaletulafono.
O le ala lea ua filiifli ai lea matafale autū ma le tumalosi i totonu o le galuega mai tausaga e tele ua mavae, ua tatau ona toe vaavaai se isi tovine o iai se vaomu’a e faamafanafana ai ma maua ai se toafilemu o le mafaufau ona o aafiaga matuiā talu lafoga a le Faifeau. Ma ua tatau foi ona vaai ma saili se isi Leoleo Mamoe, e alofa moni ma e lē faailogatagata ma lē vaai maualalo i tagata lotu, ina ia toe fafaga ma faaolaola ai o la soifua faaleagaga.
Ua alu aso ae sau foi aso ma ua silia i le 30 tausaga o le mafutaga, ae talofa e, e manatu maualalo ma vaai faatauvaa pea i le ola galulue ma le taumafai atu e tulutuliloa se ‘ai mo le Atua ma lona finagalo i totonu o le aulotu. E lē mafai e le Tusitala ona faavasega le mafatia ma le tiga o le tina a o talatala se tulaga uigaese na oo i ai saunoaga a lona taitai e pei ona ta’ua.
O le ala lava lea ua faauliulito ai se finagalo ma ua manatu ai e lē toe nonofo ae sailiili matagi i le Atua ma lana faasinomaga e faaauau ai le ola auauna ma le tautuaina o le finagalo o le Matai. O le faafeagai ai o lea aiga ma le faafitauli tuga e pei ona alia’e i totonu o le galuega, ua avea ma auala o le toe fafagu ai o nisi o mea sa la lē amanaiaina a o mafuta ma lea auauna.
Sa faamaonia e lē o loo aafia e faapea, talu mai tausaga e tele sa mafuta ai talu ona faafeagai ma lea auauna, e matuā lē manatua lava pe na iai se aso se tasi pe lua foi, na ulufale ai lea auauna i le faitotoa o le la fale.
E faalogo pea o fetaua’ina i maota ma fale o le toatele o le aulotu, peitai mo laua lava ia, e leai leai lava.
E ui ina sa leai se manatu i ai i lea tulaga, peitai o le mapuna a’e o le saunoaga lē manuia a le auauna, ua toe tata’i ai manatu ma faapea ane, masalo ai o le mafuaaga foi lea o le lē fia afea o lo la fale i se asiasiga a le Faifeau.
O le mataupu sa faagaulēmalie ai lea aiga, sa molimauina sa lagaina lava e nisi o le aulotu ona o le fia malamalama, i le fonotaga faaletausaga sa faia, ma sa fesiligia ai le Faifeau, e aunoa ma se manatu o le aiga ua aafia sa faaalia. Ae ua matuā faateia lea aiga, ina ua tu luga le Faifeau ma tali i le aulotu, ma lafo ai se lafoga e faasaga agai i le tiakono ma lona faletua o loo aafia, a o nonofo ai pea i totonu o lea fonotaga.
Na iu ina tulai ai le tamā o le aiga ma talosaga i le susuga i le Faafeagaiga, ina ia suia le mataupu e talanoaina, ae soia le talanoaina le mataupu o loo ta’ua ai lona aiga.
E lē o faamoemoe foi le faalavelave a lona aiga i se fesoasoani a le aulotu. I le ma lea, e lē mālie ma lē matagofie le talanoaina o se mataupu faapea, ua aaafia ai lagona o lona aiga.
E pei lava ona tagi talatala le tina ma ia ta’ua, se mea ina a leaga o le leva ona auauna ma mafuta faatasi, ae toe tutui mai lava i lafoga ma saunoaga lē manuia ma le faaluma aiga ma le faamaasiasi tagata.
O le solomuli ese ma le ekalesia ma le aulotu, o se faaiuga e manatu ua talafeagai foi ma lea vaitaimi ma lea foi mea ua tupu ai.
O le mā ma le ta’ufaatauvaaina, o se aafiaga e lē iloa poo afea e faamaloloina ai ma faagalo. Ae ui i lea o le a inu pea ma faamagalo i ai, ae agai pea i luma le savaliga i se isi laasaga o le a faailoa mai e le Atua.
E lē o le manu’a i le lē afea e le Faifeau o le faalavelave na mafua ai ona laga lea mataupu, peitai o se manu’a e mai faamatalaga faalumaluma ma upu faifai ua matuā aafia ai le loto ma lagona.
Saunoa le tina, e sili le manu’a e aliali nai lo le manu’a i totonu o le loto.
O le a nonofo pea ma tatalo i le Atua ina ia faasino mai se isi tovine e agai i ai ma tautua ai mo le lumanai.
O le a lē agai foi i le tulafono ona o le faaaloalo.
