Na ta‘ua e Duco Events, o lenei seleni o le a vaevaeina lea i lē e manumalo ma le faia‘ina. O le aofai e ova ma le miliona tala. E sili atu lea i le seleni na maua e Shane Cameron ma Toaletai David Tua i le la fusuaga i le 2009.
O loo fai pea talanoaga a Duco Events ma le alii mai Aferika i le aso ma le taimi e feiloai ai i le maea. O Takam na fanau i Cameroon, ae o loo nofo i ma koleni i Falani. A o lana vaega e pei o Duco, o Italia e iai. O loo talanoa pea la Duco ma le vaega a Takam.
O lē e manumalo i le la fusuaga o le a sauni loa e fusu ma le alii Peretania o Anthony Joshua, lea na manumalo i le paga ma Charles Martin o Amerika i le aso 9 o le masina nei lava.
Fai mai a Duco Events, e matuā tele lava talanoaga i le nofoaga e fai ai le fusuaga. Pe o Falani poo Niu Sila, ae foliga mai ua manumalo Niu Sila. Ae e lē o mautinoa mai foi le aso. E foliga mai o le aso 21 o Me o le a faatino ai le taaloga. “O loo matou talanoa pea ma Takam ma lana vaega. Ae e lē sainia se konekarate,” saunoaga a David Higgins le pule a le Duco Events. “E fai lava foi si felefele o le mataupu i le taimi lenei. E iai mea ua ioe i ai itu e lua e iai foi mea o loo talanoaina pea.” 
Fai mai Higgins, o le fusuaga lea, e matuā pito sili atu ona tele nai lo isi lava fusuaga ua latou faatinoina. E foliga mai o le a faia i Aukilani le fusu’aga aua e tele le maketi i Aukilani.
Ae o loo tapena pea Joseph Parker ma koleni i Las Vegas ma lana faiaoga o Kevin Barry. Na faailoa foi se manatu o Laauli, fai mai, a faapea e ave i fafo i Falani le fusuaga e leai se faaletonu i lea. O loo sauni o ia i mea uma lava. Ae o lona lava manao ia fai i Niu Sila le fusuaga.
“Ou te matuā fiafia lava e fusu i Niu Sila auā e toatele le lagolago e maua iina. Ae afai o se atunuu i fafo e fai ai e leai foi se faaletonu o lea,” o lana saunoaga lea i le Stuff.co.nz.
A o le faailoa mai a le NZ Herald na ta‘ua ai ua ioe itu e lua i le fusuaga. O tala ia mai le IBF. Peitai fai mai Higgins, o loo faatalitali pea le latou vaega i le ioe o Takam i isi itu o le konekalate.
O le alii lenei o Carlos Takam ua 35 ona tausaga, ma ua 36 ana fusuaga faapolofesa. Na fusu o ia mo Cameroon i le vaega o le Paga Matuā Mamafa (Supa Heavy) i le Olimipeka i le 2004. Na manumalo ma uu foi e ia le fusi Faaleoleo i le Paga Mamafa a le WBC. I lea fusuaga na fusu ai Takam ma Tony Thompson. Ma na manumalo ai Takam i ‘ai 117-111, 117-111 ma le 119-109. I le aofai o ana fusuaga, e 36, e 33 ana manumalo, 2 faia‘ina ma le Tutusa e tasi. O lona uiga, e fai a foi si lelei o le fusu a le Aferika lenei.
