E auala eseese mai lava faamanuiaga a le Atua i lana fanau, o le tali foi lea o le manaoga o loo nofo tatalo ai mātua aemaise o faiaoga ina ia maua nisi auala e atinae ai pea le ola aoaoina o fanau laiti i totonu o aoga amata.
O le auga lea ma le faamoemoe o le Fetu i Sasae Aoga amata i le afiafi o le Aso Faraile, aso 14 Novema i le latou hall i Otara, o le alagaina o le viiga ma le faafetai i le Atua ona o mea ua foai mo le faaleleiina o aoaoga a le fanau.
Na faatumulia lea aso i mātua, aemaise o auvalaaulia faapitoa lea sa faatasi atu i ai le failautusi o le Sosaiete a Aoga Amata i Aotearoa le faletua ia Sofaea Penn, o le faletua ia Seesee Siaosi o loo galue nei i le KidiCorp ABC i Manukau ma le susuga ia Chris Filipo sa fai ma sui o le St Vince De Paul e molimau le tatalaina o nei meaalofa ua tuuina atu mo le Fetu i Sasae Aoga Amata.
O le susuga i le faafeagaiga ia Rev Eperone Futi na taitaia lenei polokalame i le sauniga lotu pupuu, ma saunoa ai loa le fofoga o le aso le susuga ia Lilomaiava Asi o se tasi o sui o le komiti faafoe, e faafeiloai le auvalaaulia ma le mamalu o mātua.
Na sosoo ma le faaula, ma le ootiina o le lipine e le faletua ia Sofaea Penn, ma tatala aloaia ai loa mātua ma fanau e matamata ma faataitai i le faaaogāina o computers. Na foai foi e le auvalaaulia ni meaalofa tupe mo le aoga auā lava le faaleleiina atili o aoaoga a le fanau. Ae na saunoa faafetai Rev Eperone Futi mo le faletua ia Seesee Siaosi ona o ia ua mafua ai ona maua e le latou aoga lenei faamanuiaga. Na ta‘ua e le faafeagaiga o le uso o lenei tina o loo galue i totonu o le aoga, na mafua ai ona latou fesootai ma le susuga ia Chris Filipo mo se fesoasoani.
O le faletua ia Pauai Afele o se tasi foi o sui o le komiti faafoe o lenei aoga na saunoa e momoli le faafetai i le susuga ia Chris Filipo ma lana pule ona o lenei faaaloalo maualuga ua maau i ai mo le aoga, ma toe saunoa ai loa le fofoga o le aso e momoli ni meaalofa na saunia e le faletua ia Salataima Futi ma faiaoga mo le mamalu o le auvalaaulia, ma faaiu ai loa i le taumafataga.
Ae o le saoasaoa tele o le iloa ma le faaaogāina e fanau o mea tau tekenolosi i lenei vaitau, na mafua ai ona a‘e se tofa ma se lagona i le faletua ia Salataima Futi ma faiaoga e sailia ni computers mo fanau laiti ina ia atinae ai pea lo latou ola aoaoina.
Auā o le tele o talitonuga a nisi o faiaoga ma mātua, a lelei le faafaileleina o fanau i aoga amata o le faigofie foi lea o galuega a faiaoga o loo galulue i aoga maualuluga.
Ua amata nei ona galulue faiaoga o le Fetu i Sasae Aoga Amata e aoao fanau i computers e aunoa ma le toe faaaogā o ni peni ma ni api e pei ona amata mai ai aoaoga.
