O le fetalaiga i le faiva i tua‘au, “A laga le mafua, ua laga foi le lauamanu e faailo ai ua taaali‘i le inafo”, o le alofa foi o le ula lea o faigamea ma o le faamaualaloina e le tagata o ia lava, o le ala lea i le faaeaina, ua faapena se lagona e fia faailoa atu e pei ona faamanuiaina ai le tamalii o le atunuu, le susuga Memea Eleitino Bubsy Ma‘aelopa o Kalaiesetete i lana award taualoa ma le anagata o le MNZM (Member of the New Zealand Order of Merit).
E pei ona faalauiloa mai i le aso 7 Iuni 2010, le Aso Gafua lea o le aso mālōlō masani mo le faailogaina o le aso soifua o le Tupu Tamaitai o Peretania, lea foi e tuu aloaia mai ai i luga o faasalalauga, televise ma nusipepa se lisi o suafa o i latou ua faaeaina e ala ia latou auaunaga lē faatuaoia mo le atunuu o Niu Sila e ala i soo se mātātā.
O le susuga ia Memea Eleitino Ma‘aelopa ua tusa ma le 26 tausaga talu ona aumau i Kalaiesetete, o ona afioaga i Samoa o Sapapalii, Sapunaoa ma Samatau, o le taimi nei o loo umia foi e ia se tasi tulaga maualuga o le malo o le Justice of the Peace (JP), ma ua ia ausia lenei award ona o ana auaunaga mo tagata Pasefika, aemaise faalapotopotoga eseese e fesoasoani ai i tagata Pasefika i totonu lava o lenei aai i tausaga e tele.
O nisi nei o faalapotopotoga e pei ona ofoina atu i ai lana tautua: Pacific Trust Canterbury, o loo ia vaaia le itu tau tupe, o ia o le Faaao (Patron) o le mafutaga a alii ma tamaitai Samoa i le Iunivesite i Canterbury, Need Trust Board, Canterbury Pasifika Ltd, Ofisa o Leoleo mo le saogalemu o tagata, COGS, Mafutaga Matai Samoa i Kalaiesetete, ma o loo tapuai le tamalii nei i lana ekalesia Aso Fitu o le Toe Afio Mai i Aranui.
I se faatalanoaga ma le tusitala i lona ofisa na saunoa ai Memea, i lona faateia ina ua maua se tusi mai le ofisa o le Kovana o Niu Sila e faalauiloa mai ai le filifilia o ia mo le ausiaina o lenei faailoga, ae mulimuli mai le tusi faafetai a le alii Palemia o le malo (Hon John Key).
Ua ia ta‘ua lona faatāuaina o lenei faailoga sa ia lē manatu na te mauaina “O ai ea a‘u nei ua manatu mai ai?”, ae ua ia faafoi le viiga i le Atua ma lona loto faamaualalo e faafetaia ai mea silisili ua Ia faia mo lona tagata, aemaise foi o lana faafetai i le mamalu o le atunuu i le lagolagoina o sana auaunaga faatauvaa sa taumafai i ai.
Na ia faalauiloa mai foi lona loto finau ma le tauivi pea ma le lē faalogologotiga e tuli se ‘ai, e ui ina tele faafitauli ma luitau la te fetaiai pea, o se mitamitaga foi lea i si ona aiga, ua lagona le fiafia i le faaea atunuu, faaea aiga aemaise le faaea ekalesia “Honour is bitter sweet”. Faamalo le tautua matavela lau susuga Memea Eleitino Maaelopa (MNZM, JP), o le alofa o le ula lea o faigamea, auā e lē uma le alofa, o le alofa e gafatia ai mea uma.
