O le fiafiaga sili i soo se matua le silasila a o sasaa faauto mai le lagi manuia i alo ma fanau na faafailele ma tulivae ai. O se faataitaiga lelei foi pe a matua le tofa ma faafoi le viiga i le Atua ae aua lava ne‘i ia i tatou, o se finagalo lea o le susuga i le faafeagaiga taulagi ia Apouani Unasa, i le mae‘a ai o le faamoemoe o nai ona alo i le Aso Toonai na tea nei, e pei ona silamaimoa le mamalu o Samoa aemaise o uo ma aiga i le taleni faauuina mo viiga o le Atua, sa tautiga ma faaolomaau i le a‘otauina ina ia saofaga le taulaga siitia.
I le maitau a la tatou pepa, o aufaipese papalagi aemaise lava aufaipese a tamauli i Amerika e talenia i pesega faa Southen Gospel, peitai o lea ua mafai e ni alo Samoa i Melepone ona ausia le tulaga maualuga o saafi ai papalagi.
I le faagasolo ai o le faafiafiaga, na faailoa ai e le au uso le tautiga o nai o latou mātua i le taumafaiga o o latou olaga aemaise lava o le aufaipese a le Ekalesia e pei ona amata fofoa mai ai le taleni pese.
O le viiga sili ua tau lau o le faamoemoe, ae na matagofie naua o le lagolagosua a le mamalu ma le paia o le atunuu na afifio mai, i le mamalu o le aufaigaluega paia, tupu ma e‘e ma tamalii seia oo i mauga tamatama, faafetai tele lo tou faaeaea Samoa ua iu manuia ai le faamoemoe.
