O le mae‘a ai o le Pasifika Festival i le Aso Toonai ma le Aso Sa i le vaiaso atu i ona tua, 14 & 15 o Mati, ae agiga ai luga o le polokalame a le Aoaomalu Manogi o le Lolo ma le tele o nisi faasoa i leitio Samoa i Niu Sila nei, finagalo lē fiafia o le atunuu i le faasoaina o le ‘ava lea sa amatalia ai le tatalaina aloia o le fata mo le Nuu o Samoa le Samoa Village, i le Pasifika Festival o lenei tausaga e pei ona faia i le Mt Hayman i Manukau.
O le tulai mai ai o lenei faafitauli i le faasoaina o le ava, na fesiligia ai e finagalo o nisi o tamalii o le atunuu, poo le mea ea ua sui le faiga faavae o le ‘ava e pei ona masani mai ai Samoa.
O le aso muamua o le Pasifika Festival, na faatinoina ai le ‘ava, ma o le Taimua Youth Ministries sa nafa ma lea faamoemoe. O le tofa ia Tauanuu Sealiimalietoa Perenise Tapu, o se tasi o faiaoga i le gagana Samoa, o ia lea sa tuu a lalo i lē sa faasoaina le ‘ava.
E to‘a 18 i latou sa faasoaina i ai, e 13 tamaitai ma le 5 o alii. O le ipu muamua sa inu ai le susuga i le faafeagaiga o lē sa taitaiina le sauniga, ona sosoo ai lea ma le ipu e inu ai lona faletua; o iina sa tuufesili ai loa manatu o i latou sa molimauina lea taeao, poo sao le inu a le faletua o le susuga i le faafeagaiga.
O nisi o tina sa tufa i ai le ‘ava o tamaitai faipule o le National Party lea sa auai ai foi i lea aso, faatasi ai ma le tamaitai pule o le Turisi mai Samoa.
O le suiga o le ‘ava i lea taeao na nenefu ai ma channels o nisi o i latou ma oo ai lava ina latou fesiligia i luga o le polokalame a le Aoao Malu Manogi o le Lolo i matai o loo latou faatautaia lea polokalame, so latou finagalo poo fea le sa‘o o nei mea.
Na fesiligia le tamā matua ia Tuaopepe i sona finagalo, o ia foi o le taitai o le polokalame. Ae na ia saunoa, o le ‘ava e lē soona inu ai se isi e lē o se matai, se‘i vaganā ai le aufaigaluega, ae lē faapea a inu le faifeau ona inu atu ai fua lea ma lona faletua.
E ese mai ai ma le Ekalesia Metotisi, o latou e ese le tulaga o le Sea, ese foi le tulaga o le Peresetene o le auso fealofani pe a iai.
O le ala lena afai e tufa le ‘ava i nisi o faamoemoe a lea foi ekalesia, o le a tufa ai le ava a le faafeagaiga le Sea, ma amanaia ai foi ma lona faletua, e lē faapea ona o ia o le faletua o le Sea, ae o loo faaaloalogia i lona tofiga o le Peresetene o le auso fealofani pe afai o iai iina le faletua.
Ae o le ‘ava lava latou a le atunuu, e lē mafai ona soona inu ai se isi, e oo lava i tagata o loo latou agaia le ava, e lē mafai ona inu auā e lē sala i tua le ‘ava.
I se finagalo o le tofa ia Tauanuu Sealiimalietoa Perenise Tapu, o ia lea sa nafa tonu ma lenei faamoemoe na faaalia ai sona lagona e faapea:
(1) O le alofi poo le ‘ava a le atunuu, e ala ona fai ona o le agaga o le faaaloalo, ma le talia o se isi i se valaaulia pe talia foi se malaga poo se isi tulaga.
O le aotelega o le ‘ava o loo manino lava ma lelei. Ae o le faamaninoina o le mea sa tupu, e toa sefulu valu i latou sa feinu ai, e 5 alii ma tamaitai e 13. Ma e toatele foi faipule tamaitai o le National Party sa auai.
I lona lagona sa iai, o loo inu le ‘ava a faipule tamaitai a le National, ona ia manatu lea e faigata tele ia te ia le inu o faipule tamaitai nei ae o lea e nofo le tina o le galuega. O le fesili, E tatau ona ave ni ‘ava i tamaitai ia, pe afai ua fesiligia le faletua, ae o le faletua o le Samoa?
I sona la lagona e leai se tulafono e faapea, o ai e matuā faasā, ae o le ā se tulafono. O le agaga o le faaaloalo e ala ai ona fai ma le laulalo i le faaaloalo. Ma e lē o fetaui ia te ia le inu o nei faipule tamaitai ae o loo nofo le tina o le galuega.
Ae o loo manino lava tulaga o Samoa, e pei ona iai saofai i Samoa, e uma lava tulai le aufaigaluega, ae tali le alofi o le faafotutupu. E fua foi le aga o le aganuu i mea o loo tutupu ma tagata o loo iai, ma e lē o iai foi sona lagona e solofa le mea ua autasi i ai, ae sa autilotilo i lea aso o le mea ua alaga tatau ona ia faia.
(2) A fai se faamati, e asiasi faletua ma tausi ma saoao i nisi o mafutaga a tina, a oo ina o i nei vaega o le Ekalesia o loo faatali mai, e fai le alofi, o le fesili e tulai mai, e taumafa le faletua pe leai? Tali – Ioe e taumafa. Aisea? Auā o lea e faauluulu i ai le mafutaga a tina. Ana faapea o iai se vaega e matuā faasā mai e Samoa o lona uiga o le mea foi lena e tatau ona iai.
(3) O le ‘ava, o le agnuu o le faaaloalo. O le fesili e tulai mai, Aisea ua tatou avea ai le ‘ava i palalagi? Ae e iai foi se tulafono e sā ona inu se palagi, Tali e leai. O le mea moni Samoa ua tatou tatala i tua le tatou aganuu.
Ma o le mea foi e tatau ona fai, o le aganuu ma lona aga, e lē faapea foi o le mea o le a tumau i ai finagalo ma mafaufau. O se lagona foi na oo ia te ia, o le inu o tagata ese ae nofonofo le faletua e ona le aganuu.
O inei i Niu Sila ua tatala le ‘ava i soo se isi, ae o tagata ua ave i ai le tofi, ma o le faletua foi o le tina o le galuega, o le tofi tāua, e tāua i soo se ekalesia.
Faaalia lava le lagona o le tofa ia Tauanuu e lē faatauagavale i le measina a Samoa, auā o le ‘ava o le mea pito i sili lea ona tāua i le atunuu pe a feiloai, aemaise e faailoa atu ai lana faaaloalo.
Sa faapea foi ona tuuina mai ai ma lana faamaualaloga i finagalo o le atunuu pe afai ua faoa e le ta nisi o lagona. Upu a le atunuu e poto lava le tautai ae sese lana atu i ama. Ma e leai foi sona lagona e taumafai e aumai se mea fou e sui ai le faavae o le aganuu a Samoa i le faatinoina o le ‘ava.
O le faatonuga foi na tuuina atu ia te ia i le faatinoina o le ava, e leai ni lauga, na o se upu lava e faafeiloai ai le auvalaaulia ona pati loa lea o le agatonu.
