O le a molimauina i lenei tausaga ua amatalia le vevela o faatosina a Vaega Faaupufai ma sui tauva ua sauni mo le faigapalota tele a le atunuu i le tausaga fou 2016.
O lona uiga o le a lē gata ina sasa pala e le aufaipolokiki mataupu e agai i le tamaoaiga, ae o le a faapena foi i nisi o mataupu o loo taoto nei i le Palemene e pei o le lipoti a le komiti faapalemene sa suesueina atili le lipoti a le pule ma le suetusi sili e faasino i faletonu na aliali mai i totonu o nisi o matagaluega a le malo.
O le lipoti lea o loo faamaai nei i ai lagona faaalia o le Itu agai pe a toe tauaofia le Palemene i le isi lua vaiaso o lumanai, lea o le a soalaupule ai le tala faaopoopo o le tupe mo le tausaga faaletupe 2014 i le 2015.
O loo olioli atu foi le Itu agai e osofai le faigamalo a le HRPP i suiga o le faavae o loo fia faatino i le aveesea o nofoa o le aupalota taitoatasi ae suia i nofoa mo itumalo tu taulaga, aemaise le teuteuga i le soloia o nofoa tailua o nisi o itumalo faafaipule ae suia i le vaevae o ia itumalo ma toatasi le sui faipule.
E lē o lagolagoina e faipule o loo nofoia ia nofoa i le taimi nei e lē gata o le itu a le Malo ae faapea le itu agai. O le saunoaga a le palemia mo le fafeiloaiina o le tausaga fou na ia faaalia ai o le toe tausaga lenei 2015 o le Nofoaiga a le Palemene ona alofaiva loa lea i Faigapalota Lautele i le Tausaga 2016.
E lē tuuitiitia ai taumafaiga a le Malo e faaleleia atili faiga faavae o a tatou Faigapalota ina ia faavae faiga filifiliga i le faamasinoga tonu.
