“E leai sa‘u pisinisi ile finauga ua i luma ole faamasinoga maualuga”… Faamasino
Ua valaau faalua moliaga ole faatonu ole ofisa o moliaga tau solitulafono, le afioga Mauga Precious Chang ile faamasinoga faaitumalo, ae e lei maua lava se taotoga ole finauga poo ai ole loia ua filifilia ele Loia Sili ale Malo, male loia ua ave iai malosiaga uma ole faatonu ole ofisa o moliaga tau solitulafono e finauina moliaga o solitulafono tau taavaleafi oloo molia ai Mauga Precious Chang.
Ole Aso Faraile na tea nei, 23 o Setema 2016, na toe tulai ai le tamaitai faatonu ile faamasinoga mole valaauga faalua ole mataupu peitai sa aliali ai ni finauga ile va o Satiu Simativa Perese ole loia mai Niu Sila na filifilia ele Loia Sili le afioga Lemalu Hermann Retzlaff, male tamaitai loia sinia le afioga Taulapapa Brenda Heather Latu, lea e faapea ua ave iai paoa ma malosiaga faaletulafono ole faatonu ole ofisa o moliaga tau solitulafono, ona oloo faamalolo lē tumau faatonu ona o moliaga ua tuua‘ia ai.
Na tulai Satiu Simativa ma ia faailoa se tusi ua tuuina atu e leoleo ua faailoa ai le faatali o leoleo ile finauga ua i luma ole faamasinoga maualuga poo ai e finauina moliaga. Peitai na tulai foi Taulapapa Brenda ma ia tuuina atu se tusi mai leoleo ua faaalia ai e lei faia se ioega a leoleo e ave ai fua le finauina o moliaga ise isi i tua atu o leoleo. O lona uiga e ta‘u mai ai e mafai lava e leoleo ona tulai e finau moliaga ole tamaitai faatonu.
Sa faailoa ele tamaitai loia o Taulapapa Brenda ile faamasinoga oloo taoto le talosaga ale Loia Sili ile faamasinoga maualuga oloo finauina ai le vala, poo ai e tu e finau moliaga. Peitai na tali le afioga ile faamasino ole faamasinoga faaitumalo, Vaepule Vaemoa Vaai, e leai sana pisinisi ile finauga ua i luma ole faamasinoga maualuga.
Ua finagalo ai le afioga ile faamasino e faatulaga loa aso e suesueina ai molimau auā o lea ua faaulu le tali tetee a Mauga Precious i moliaga ole avetaavale faatamala ua oo ai manu‘a ise tagata, male moliaga ole avetaavale matautia.
Ua faatulaga foi ele faamasino le aso e toe vaalaau ai moliaga ina ia faailoa ai e leoleo pe ua iai nisi moliaga faaopoopo ona ua finau mai le alii loia o Satui Simativa, e lei maua mai se faaaliga mo ia mai leoleo ile tulaga lea.
Peitai ua faailoa atu foi ele tamaitai loia o Taulapapa Brenda e na ole lua lava moliaga a leoleo, ma e leai se isi moliaga faaopoopo. Ole feteenaiga lenei ua toso ai le mataupu ona e pei ona faailoa atu i nisi o lipoti ua tuanai, ole oso faalava ole Loia Sili ile faagaioia ole mataupu i moliaga ole Komesina o leoleo ma moliaga ole Faatonu ole ofisa o moliaga tau solitulafono, ua aliali mai ai i fafo male fefaaaliga o silafia ma iloa ile faamatalaina ole tulafono faavae ma malosiaga ua aveesea mai le Loia Sili, ma malosiaga ua tuuina atu ile faatonu ole ofisa o moliaga tau solitulafono.
Ole aso 28 male 29 o Novema ua faatulaga e valaau ai molimau o moliaga o Mauga Precious Chang. Ole a faatali foi ile taunuuga ole talosaga ale Loia Sili ile faamasinoga maualuga poo ai e finauina moliaga, ma e tatau ona oo atu ile aso e valaau ai molimau a leoleo ua maua se taotoga o lea finauga.
