O le valoaga lea a le Pulega o Tagata Tafafao Maimoa mai i fafo i le tupe o le a aoina i Samoa ona o tagata tafafao maimoa mai i fafo, mai i le tausaga lenei seia oo atu i le tausaga e 2019. O fuafuaga faataatitia ua faalauiloa nei e le Pulega i le faagasologa o ana galuega i le tasi lenei o atina‘e ua faaauau ona maualuga ai le tupe maua o le tamaoaiga o Samoa i lea tausaga ma lea tausaga.
O le faaleleia o nofoaga e pei o faletalimalo, o le unai o auala e maketi pe faatosina mai ai tagata tafafao mai i Samoa, o le faamalosia o ofisa o lea pulega i vaega eseese o le lalolagi, o nisi nei o vaega o lenei fuafuaga faataatia na faalauiloa i le faaiuga o le vaiaso ua tuanai ma le faamoemoe a lelei ona faagasolo ma ausia nisi o nei fuafuaga o le a manino le tupe e pei ona ta‘ua o le a maua e Samoa i le isi lima tausaga ua amata savalia nei.
Ua talafeauga le faalauiloa o lenei fuafuaga a le Pulega ma le taimi ua atofa i tausaga taitasi e faatino ai le vaiaso o faaaliga o tu ma aganuu a Samoa. Na amata faatautaia le Vaiaso o le Teuila, o se galuega lea e tali atu i le vaitaimi lenei e tau leai ni tagata e asiasi mai ai i Samoa ma ua latalata i le 20 tausaga talu ona faatino lenei vaiaso ma ua tele le suiga i le tupe maua ma le numera o tagata asiasi mai i Samoa i lenei vaitau o le tausaga.
Ua le gata i tagata mai i Europa ma Asia, Niu Sila ma Ausetalia faapea ai Amerika Samoa ma isi vaega o Amerika, ae o le toatele o tagatānuu o Samoa lava ia i atunuu nei ua malaga mai lava ona o le manaoga e auai i tauvaga o loo faagasolo i taaloga ma faafiafiaga o lenei vaiaso tāua.
O se tasi o faatāua ua ave i le unaiga o lenei atina‘e o avanoa faigaluega e maua ai ma ua valoia foi le oo atu i le tausaga e 2019 ua faaopoopo avanoa faigaluega e tusa ma le 1,700 i atina‘e tau tagata tafafao maimoa mai i fafo, e aofia ai galuega i faletalimalo fou, apitaga tu matafaga, o avanoa faigaluega i felaua‘iga poo taavale, o avanoa i fale‘aiga atoa ai le itu i faafiafiaga ma isi lava auaunaga ua fesootai ma tagata tafafao maimoa mai i fafo. O le faamoemoe maualuga e pei ona saunoa i ai le alii Palemia, ia faaauau e Samoa ona ave le faamamafa i le tāua o le atina‘e o le atunuu ma le faamautu ai o ana measina i tu ma aganuu talimalo, ina ia faaauau ai foi le asiasi mai o le toatele o tagata tafafao asiasi mai i le atunuu.
