O le sefulu lenei o tausaga o faasavali i le vaiaso atoa le faaaliga ma le faamamaluina o tu ma aganuu eseese o nofoia Melepone Vitoria (10th Cultural Diversity Week) na tatala aloaia i le Aso Toonai aso 17, i le taumafataga faapitoa o le afiafi a le Palemia faa-Setete (Premiers Gala Dinner) ma itu faaupufai e lua a Vitoria, lea na valaaulia ai sui e ta‘i 12 mai atunuu eseese.
O le Fono faufautua mo tagata Samoa i Vitoria na valaaulia e le malo e fai ma sui o Samoa. Saunoa le taitaifono le afioga a Lemalu Tevaseu Satupa‘i, e silia ma le selau atunuu eseese sa auai i lea po, ma o se taimi muamua lea ua valaaulia ai ni sui o Samoa, e lagona le faagaeetia ona o le amanaiaina o nai o tatou tagata, aemaise o a tatou tu ma aga i fanua i meafai a le malo faa-Setete.
O le Aso Sa aso 25 na faia i le Viva Victoria Festival i le fatu o le taulaga i Melepone le Federation Square, o se fiafia tele lava sa faapitoa mo pesepesega, o siva, o le kukaina o taumafa eseese faapea foi ma le faalauiloaina o laei ma lavalava aemaise o galuega taulima mai atunuu e fia, ma tapuni aloaia ai le faamoemoe. Sa mafai ona feafioai tagata lautele ma tofoina taumafa eseese nei sa kukaina, ma faatau foi ni laei ma musika aemaise o galuega taulima sa faalauiloa.
E tāua tele le amanaia o a tatou tu ma aga i fanua e le atunuu tele nei o Ausetalia, ma soo se atunuu lava, auā o a tatou measina e lē mafai ona mavae ese ma finagalo ma loto.
