O le moemitiga a mātua le afioga Galumalemana Eneata Frost ma le faletua ia Matapepe G. Frost na la tuuina atu i le Atua mo si o la alo tamaitai o Paulia G. Afamasaga Frost, lea ua faamalieina ai o laua loto ma faafetai a‘e ai o laua agaga i le Atua, ina ua talia talosaga aemaise lava ona o le lagona foi o i le afafine ua ogatasi lava ma le manao tuumumusu a mātua i le Atua, lea la na sauni atu ai le tamaitai faifeau tala‘i mo lana malaga i Amerika i le afiafi o le Aso Gafua o le vaiaso talu ai auā le faasauni atu mo le galuega a le Atua.
Na faia se sauniga faapitoa i le afiafi o le Aso Sa (2 Aukuso 2014) na tuuina atu ai faamanuiaga, ma faapaiaina ai le avea o le tamaitai o Paulia ma faifeau tala‘i, ma na saunoa le taitai o le sauniga e faapea, e telē lona talitonuga ma le maumaututu o lona iloa, o se valaauina ua tatau ma talafeagai lelei lea ua maua e Sister Paulia Frost auā ua lava tapena ma ua agavaa lelei mo le faataunuuina o le finagalo o le Atua.
Na molimau foi le susuga i le taitai, e lavatia lelei e le tamaitai faifeau tala‘i ona ia tauave ni faafitauli ma ni faafatuatama‘i o le a feagai ma ia, auā ua matuā telē le sao o taitai, o faiaoga, o ē sa lagolagosua i ana tapenaga, aemaise lava o le matafaioi a mātua sa tapueina ai le ola faaleagaga o le tamaitai nei, lea ua agai atu e faataunuu ma faatino lona valaauina ma le talitonuga ua lava taoso lona sa mo le faamoemoe.
Faamanuiaga
Ia Paulia o ou māmā na, ia manuia lava lou faamoemoe i le avea ai o oe e fai ma faifeau tala‘i i na atunuu mamao. Ia faamamanaina lou loto ma lou fofoga e le Atua. Ia utupupuina lau uto e le mana o le Agaga Paia ina ia suamalie i le faafofoga a i latou o le a maua avanoa e te tala‘i atu i ai le Tala Lelei ia Iesu Keriso, ina ua faoa mai o latou loto ma ia maua ai ni agaga se tele mo le malo o Keriso ona o oe.
Ia manuina ou ala ma ia tausia pea oe e aao alofa o le Atua ina ia amataina i le manuia lau galuega, ia faaiuina foi i le alofa ma le agalelei o le Atua ina ia e toe taliu mai ma le manuia, ae faafoi pea le viiga o le Atua Soifua. Ia manuia lau malaga Sister Paulia G.A.Frost.
Alofaaga mo oe mai ou aiga uma lava i Aotearoa nei, Ausetalia i lou grandma Vaalele Toomata Afamasaga ma aiga uma, Samoa ma Tutuila, Amerika ma isi lava atunuu o aumau ai ou tauaiga uma.
