O le Faalapotopotoga aupito telē lenei i totonu o le Pasefika ua vaaia le tulaga tau i puipuiga ma le faasao o le Siosiomaga, lea e ta‘ua o le SPREP poo le Ofisa Tutotonu o le Siosiomaga a le Pasefika.
O lona faavae mai o Samoa lava na faatu ai ma o lona nofoaga tutotonu ua i Vailima i le taimi lenei.
O le vaiaso lenei ua usuia ai lana fonotaga faaletausaga lona 26 i le Pasefika, ma o Samoa foi la ua fai mai i ai mo lea fono tele. E 16 atumotu o le Pasefika o loo i totonu o lenei Faalapotopotoga, ae e tele ana paaga o atunuu tetele o le lalolagi ua fesoasoani i le faatupega o ana polokalame eseese o le faasao ma galuega tau i le puipuiga.
O le tausaga lenei ua faamautu ai le ofisa fou ua patino lava i fesuaiga o le tau.
O lenei ofisa ua i totonu o le lotoā o le SPREP i Vailima ma ua agai lana auaunaga i le faasoa atu o tupe mo polokalame a atumotu eseese e faatatau i le tali atu i suiga ogaoga o le tau ua aafia ai soifua o tagata o le Pasefika.
O le tausaga na tea nei na faamaonia ai e le lala o le Siosiomaga a le Lalolagi, o le SPREP o le a ave i ai le faatagana na te faatautaia ai talosaga mai i atumotu o le Pasefika i fesoasoani tau tupe auā le faatinoga o galuega tetele e mafai ai ona tali atu atumotu i suiga o le tau ua aafia ai. O le siisii o le sami, o le unaiga o puipuiga i nofoaga tu lalata i matafaga ma tu lalata i vaitafe, o le fausia o auala e tali atu ai motu laiti ma ona tagata i afā fulifao ma isi lava luitau o suiga o le tau.
O le faitau miliona o tālā ua mafai ona aumai i le fesoasoani lea a malo tetele o le lalolagi ua faaleagaina le siosiomaga ma ua ave i motu laiti ia ua matuā tele atu le aafiaga ae e lē o malosi se sao i le faaleagaina o le siosiomaga pe a fua i malo tetele.
O lea la ua faamautu nei ia fesoasoani i le ofisa o le SPREP ma o le fono tele lenei ua usuia i lenei vaiaso ua silasila ai le Faalapotopotoga lenei i talosaga atunuu o le Pasefika ua oo atu auā le tali atu ai i suiga o le tau.
E maualuga foi le tulaga o le a mafai ai e atumotu ona maua nei fesoasoani ma ua talanoaina uma i lenei vaiaso auala e mafai ai ona maua ia tinoitupe.
O le tele o atumotu laiti o le Pasefika o le saili lava o nofoaga saogalemu maualuluga e agai i ai. O le faia o galuega ina ia malupuipuia le suavai taumafa, o le faia o auala e tetee atu ai i tafega ma lologa.
E tele ma anoanoai auala e talosaga ai fesoasoani ae ua ta‘ua e le ofisa o le siosiomaga, a lē faamalieina lava le Faalapotopotoga i le tulaga o talosaga, e faigata foi ona maua e atumotu lea fesoasoani.
